بعيد ميلادها الثالث ..الحكومة صارت بتمشي
|| Midline-news || – الوسط …
=أنا : مرحبا – كيفك؟
= هو : أهلين .. منيح الحمد لله
= أنا : كل عام وأنت بخير
= هو: خير شو مناسبة هالمعايدة ؟ إذا العيد لسا ما إجا و لا عيد ميلادي اليوم!
= أنا : أي بعرف إنو لسا ما إجا العيد و أنو اليوم مو عيد ميلادك بس المناسبة أهم من هي وهي بكتير .
= هو: أوف وشو هالمناسبة بالله؟!
= أنا : يا رجل عيد ميلاد حكومتنا العتيدة , اليوم طفت شمعتها الثالثة يعني كملت 3 سنيين وتعلمت المشي كمان .
= هو : اذا تعلمت المشي تروح تمشي عن قلبنا مرمرتنا وخلتنا نشحد كل شي.. انشالله ما بينعاد عليها .
= أنا : كيف مرمرتك بقى ؟ بعدين لا تنسى أنو هي حكومة حرب ببلد عم يعيش حالة حرب وحصار.
=هو : والله بعرف أنو نحنا بحرب وعايش بها البلد متلي متلك بس عم تقلي حكومة حرب ؟؟
= أنا : أي خيو حكومة حرب وهي عم تحارب لتأمين احتياجات المواطنيين وبقائهم على قيد الحياة .
= هو : ليك والله نسيان الحكومة وشغلاتها وعملاتها وعيد ميلادها ووزراءها لأنو وجودون وعدمه نفس الشي وما بدي ناقشك وفوت معك بالتفاصيل.
= انا : ليش ليش إذا ما احكينا نحنا مين رح يحكي ! ولك يا حبيبي لقمتنا ورواتبنا وتفاصيل حياتنا معلقة بالحكومة وممارساتها وسياساتها .
= هو : إذا هيك حبيبي يعني عم تجيب الدب لكرمك وكرم الحكومة العتيدة طبعا إذا ضل كرم أو خلو حبايب الحكومة كروم بها البلد .
= أنا : ليك انت وغيرك لازم تعترفوا أنو الامور أحسن من الأول ؟
= هو: أي طبعا أحسن من الأول بكتير خصوصا من ناحية ارتفاع أسعار المواد وغلا الدولار والعجز عن محاربة الفساد وفرض الرسوم الإضافية على كل شي.. ولك يارجل هالحكومة ما خلت شي إلاّ وأخدت عليه رسوم وضرائب ..ولك حتى سندويشة الشاورما عليها رسوم وضرائب ولا زادت رواتب ولا قل عدد الفقراء مع أنو رفعت شعار “حكومة الفقراء ” مو شايفين غير ميزانيات وهمية وضغط مصاريف وماحدا عرفان شو عم يصير ..أحسن من الأول قلتلي روح شوف الناس بعدين احكي أي الناس صارت تترحم على الحكومات السابقة ..بس لا يجي يوم نترحم كمان على هي الحكومة .
= أنا : ليش مين قلك أنو الحكومة بتقدر تعمل بكل هالملفات؟ شو بإيدها عصا سحرية؟ بعدين من وين بدها تجيب مصاري للناس وتصرف رواتب ؟؟
= هو : ههههه رواتب! ضحكتني والله.. ليك حبيبي هالحكومة ما فيها تعمل شي, يعني يا دوبك متعلمة المشي ويمكن لسا بتعملها تحتها لهيك ما فيها تعمل شي ولا حدا معول عليها شي ..بس على الأقل تقول للناس قديش عم تجيب ضرائب من أصحاب رؤوس الأموال و محدثي النعمة اللي عم يبيضو أموالون بمشاريع وهمية .
= أنا : بس والله عم تظلموها ؟
= هو : عم قلك وجودها وعدمه نفس الشي منعرف فيه حكومة ظل بالبلد وهيي اللي عم تدير الاقتصاد ومحدثي النعمة وبتنزّل ناس وبتطلّع ناس بلعبة طاولة أو على طاولة غدا .. وهي الحكومة مجموعة موظفيين بمرتبة وزراء بيضوو على الناس والناس بيتقاتلوا .
= أنا : لا لا وقف عندك أنت بلشت تغمق كتير وأنا مارح كمل معك
= هو : أوك .. لكن سكر ع الباقي وبلا أعياد الميلاد المعتة تبعك .
= أنا : ماشي..سكرت تمي احسن ننشحط .
= هو :دخليك على شو بدنا ننشحط ما حكينا ربع اللي عم تحكيه الناس وماحدا عم يرد عليها.
=أنا :كلامك صحيح .
