الديك الفصيحالعناوين الرئيسية

‎البشر أرخص السلع في المزادات السورية المفتوحة ..‎

مزاد السيارات ورانج روفر ال 765 مليون بالشام فتقت جروح السوريين.. الي بقيوا بالوطن وحتى المغتربين.. وأجبرت الديك الفصيح يبق البحصة.. ويعمل من الخبرية جرصة.. وطالع مع السوريبن كل مخزون الصمود وصبوه.. على الراتب والأسعار والغلا والكوى والنار ورموه..

وما نسي السوريين وديكن بمناسبة المزاد الوطني يفتحوا على السوشال ميديا ملفات الفساد.. الي دهورت أحوال البلاد والعباد.. لك حتى قيصر ما نفد من كلام السوريين والديك.. وتعرض لهجوم عنيف لانو على ما يبدو قيصر مفروض على ناس وناس.. مو هيك؟!

والقصة يا سادة يا كرام انو بمزاد علني عملتو المؤسسة العامة للتجارة الخارجية.. التابعة لوزارة الصناعة السورية.. على 500 سيارة من مختلف الأصناف والأنواع والأحجام.. بصالة الجلاء على أوتوستراد المزة بالشام.. انباعت وحدة من السيارات نوع رانج روفر موديل 2019 ب 765 مليون ليرة.. ليرة تنطح ليرة.

عموما لماذا العجب يقول ديكنا القدير.. إذا 765 مليون بتساوي حوالي 255 الف دولار يعني ولا شي بالنسبة لتاجر كبير.. والي معو شو بيمنعو.

بس المثير انو سعر الرانج ببلد المنشأ موديل سنتا ما بيتجاوز ال100 الف دولار.. اي والله والله ما يسمعوا بالخبر أصحاب شركة رانج روفر لحتى يتركو بلادن ويجو يفتحو عنا كذا فرع ويجيبوا معن نسوانن وأولادن.

عموما هاد الشي بيثبتلنا انو عنا ادمغة وعقول تجارية.. قادرة تربح بالسيارة بالبلد اضعاف الي بتربحوا الشركة المنتجة الاصلية.. فلشو نعمل معامل و تلويث بيئة ووجع راس.. ولا شو رأيكن يا ناس.

765 مليون هدول حق سيارة وحدة.. فتعو نقارن هالمبلغ براتب مهن الصف الأول بالبلد بهالقعدة.. الديك يا سادة يا كرام عندو صديق.. بيشتغل طبيب بمشفى المواساة العريق.. ودرس عشرين سنة بين الكتب والمراجع والمرضى هالحكيم.. وهالدكتور طبعا موظف فئة أولى، وأخصائي، ومشرف على الأشعة يعني من الآخر بمجالو، علم وعليم.

ومع هيك فهالدكتور محتاج 1275 سنة ميلادية.. يجمع فيهن رواتب المواساة بدون ما يصرف منن قرش حتى يقدر يشتري هالرانج بلا منقودية.. بمعنى انو بحاجة يعيش اكتر ب 275 سنة من العمر الي عاشو النبي نوح.. الي عاش الف سنة ليقدر يشتري هالرانج، اي عنجد شي بيحط العقل بالكف وبيخلي بزر المخ يسوح.

طبعا هالشي مريع وكتير فظيع.. وما بيصير على وجه الكرة الأرضية.. الا بسورية.. مع انو هيك سيارة بدول العالم بيركبا الموظفين.. الي للطبقة المتوسطة منتمين.. من دون ما يبذلو جهود جبارة.. وبالتقسيط المريح.. هي من الآخر وبالعربي الفصيح.

لكن إذا حلم واحدنا يركبها هون بالشام.. فلازم يعيش عمر بيتجاوز عمر النبي نوح عليه السلام.. فالخلود لرواتبنا.. والسلام لحكومتنا.. الي بهالرواتب الزاخمة غامرتنا.

طبعا رواتب السوريين المتدنية جداً مقارنة بسعر الصرف.. وقيمة الليرة السورية وزيادة الأسعار الي تضاعفت 20 ضعف.. كشف هالمزاد مرة جديدة عن مستوى تدنيها وضآلتا.. حتى لتأمين أساسيات الحياة من أكل وشرب بس.. لدرجة انو لو افترضنا.. مع انو هالافتراض بيلعي النفس.. لو افترضنا انو متوسط الراتب 80 الف ليرة فسعر هالسيارة يساوي لا بل يفوق رواتب شهر لنص مليون موظف وموظفة.. وهالشي اذا بيثبت شي.. فهو انو هيك شي.. ما بيصير بهالكون العظيم كلو إلا بسورية.

وطبعا في إضافة رح تلهب حماس قراء زاوية الديك الفصيح.. انو سعر هالرانج الي هوي 765 مليون منو سعر نهائي لذلك وجب التوضيح.. لأنو في مدفوعات بتوصل لثلث سعر السيارة رح تندفع كجمارك وفروغ.. أي تقريباً 255 مليون ليرة فقط لا غير وهيك بيصير حق السيارة، حوالي مليار وشقفة.

طيب.. تعو خلينا نبالغ شوي باعتبار انو كلشي ببلدنا “أوفر دوس” ونشوف هالرقم الي اندفع ثمن للسيارة لو انصرف لمساعدة المعترين من السوريين شو ممكن يعمل؟!

هالمبلغ ممكن يأوي مئات الأسر المشردة.. ويطعمى الآلاف من الجوعانين الي منتورين بالطرقات وعم يدوروا عن اكل بحاويات الزبالة.. ممكن يعيد ترميم عشرات بيوت المدنيين الي هدما الإرهاب والي عم يعيشوا بظل أجارات سياحية ما بترحم.

هالمبلغ ممكن يرمم عشرات المدارس الي اتدمرت.. ممكن يصون كرامة كتير فقرا فقدوا أدنى مقومات الحياة.. ممكن يساهم باستيراد محولات كهربا تساعد بتمتع بعض السوريين ولو جزئيا بالدفا والعفا والنور والسرور.

هالمليارات الي انصرفت عالرانج أم مليار وشقفة وغيرا من السيارات الي انعرضت بالمزاد لو انحطت بالمصرف المركزي كودائع كانت كافية لتوازن سعر الدولار بالسوق السودا وترجع الدولار والأسعار ليهدوا عالأرض.. والقائمة تطول وتطول..

هامش1: مش أغرب من الخيال إلا الواقع السوري.

هامش2: ما يضحك فيبكي فيدمي انو هي السيارة وغيرا من السيارات يلي انباعوا بالمزاد تابعين لملاك الدولة، يعني المسؤليين الحكوميين بيستوردوا سياره حقها 765 مليون لموظف حكومي كبير ومستخسرين بالمواطن السوري ساعة كهربا.. وبيبقى السؤال من وين عم يجيبوا حيتان البلد هالمصاري مع انو في ناس مكسوره على حق الخبز.

لأخذ العلم الديك خلص المادة من هون واجاه طلب صداقة عالفيس من صاحب حساب اسمو فرح فلسطين من هون، المسكين رجليه ما بقا حملتو لأن الاسم أنقرأ معو فرع فلسطين.. والسلام ختام.

الوسط الاخباري

تابعوا صفحتنا على فيس بوك ..

الديك الفصيح _ المصدر الوسط

اظهر المزيد

مقالات ذات صلة

زر الذهاب إلى الأعلى