الديك الفصيح

يا حكومة .. ما يعيبك تصريح ..

|| Midline-news || – الوسط …

 

الحكومة باجتماعا الأسبوعي الماضي, ما طلع اجتماعا عالفاضي.. وصرَّحت بكلام فيه نبرة تفاؤل جديدة, وكأنها هالمرة من كلاما أكيدة..

وديك الوسط بيتمنَّى بكل نية طيبة وديكنا مو منافق.. بيتمنى بلدنا يصير أحسن بلد وتُصدق حكومتنا مع مواطنا بكل رجاء صادق.. وما ينضاف, تصريحا الجديد.. لسلسلة التصريحات الماضية الخاصة بتحسين الوضع المعيشي للمواطن السوري العتيد..

لأنو للأسف كل تصريحاتا الماضية.. ما شفنالا نتائج ملموسة ع أرض الواقع وكانت فاضية..

لكنْ هالمرَّة , عأساس غير كل مرة.. وكان في تصريح.. واضح وصريح.. إنو في آلية جديدة رح ينضبط السوق عن طريقَا.. اي انشالله تنجحوا بتطبيقا..

وقالت الحكومة انو رح يصير في توازن بالأسعار, ورح ينضرب يأيد من حديد على إيدين التجار..

وزادت حكومتنا وعادت.. إنو المواطن رح يلمس نتايجا الإيجابية لهالآلية بشكل حقيقي هيك حكومتنا أفادت..

بس التساؤل.. شو هيِّي أدوات الحكومة ع الأرض لتحقيق هاد التصريح المتفاءل؟.. يلي إذا ما تحقَّق فِعْلاً.. فَرَح يدق مسمار جديد بنعش معاناة المواطن اليومية قولاً وعملاً..

لإنو وكما تقول الأستاذة الفاضلة رويدا عطية.. شو سهل الحكي, مين الي بيعرف بقلب التاني شو في..

فيستر عليكون ما بقا المواطن حِمِل مفاجآت جديدة فارحموه.. وبتمنى إنو متل ما قلتوا يلمس نتائج فعلية وعن جديد ما تظلموه..

لإنو هالإيام ما عم يلمس هالمعتَّر.. غير انخفاض سعر الليرة, وانخفاض القوة الشرائية, وارتفاع الأسعار مو اكتر..

وبيتلمُس المسكين كمان جيبتُو.. ليتأكد إنو ضل شي من الراتب, ولَّا يقعد يندب عمصيبتو..

فحكومتنا العزيزة خلِّيكي قول وفعل.. لأنو الحكي سهل.. وعن جديد, رح إختُم بما قالته الأستاذة الفاضلة رويدا عطية.. شو سهل الحكي عرفتوا شلون يا أفندية؟؟؟

ديك الوسط الفصيح

اظهر المزيد

مقالات ذات صلة

زر الذهاب إلى الأعلى
إغلاق