الديك الفصيح

نت بلدنا قصتو قصة وحكايتو جرصة.. وسيدي المواطن ما في مجيب.. بس في اخد من الجيب..

|| Midline-news || – الوسط …

 

كتير من الخدمات الي بتقدما السورية للاتصالات.. شهدت بظل الحرب المفروضة على سورية والحصار الاقتصادي كتير من التراجعات.. والسبب منع استيراد بعض التجهيزات.. لتحسين واقع الانترنت والاتصالات..

ومن اعترافات وزارة الاتصالات الليلية.. إنو أسباب ضعف الإنترنت هوي, سعة الدارات الدولية..

بالإضافة لوجود الضجيج والرطوبة على الأسلاك وفيها.. اسم الله حولا وحواليها..

أما شو يعني رطوبة وضجيج فالمقصود جودة ونظافة الأسلاك المستخدمة.. الي بتأثر كتير على جودة الخدمة..

الحمد لله دايما في تبريرات مقنعة..  والوزارة دايما بمبرراتا مبدعة..

بس أنا عندي حل.. وشي متل الفل.. هلأ منشان الرطوبة افتحوا الشبابيك للأسلاك وهووها.. وبالنسبة للضجيج فما حدا يضوج اسكتووووا بدنا نفتح نت فكلماتكن ضبوها..

وطبعا في خطة لمد كبل بحري جديد بين قبرص وطرطوس.. وهاد بيكلف كتير فلوس.. بس منشان المواطن بتهون.. وكرمال عينو تكرم مرج عيون..

والهدف من مد الكبل التالت.. منع انقطاع أو ضعف الانترنت عالموبايل والهاتف الثابت.. بحال انقطاع واحد من الكبلين.. الي تحت سطح البحر المتوسط موجودين..

بس أمانة أمانة.. قبل ما تعملو مناقصة وتشترو الكبل.. هل يا ترى يا هل ترى سألتو القرش شو نوع الكبل الي بيحبو هالندل..

مو منشان شي بس منشان لما ييجي القرش وإخواتوا.. يقرطوا الكبل هالمرة ما تتغير عليهن نكهة الكبل وطعماتوا..

لأ وكلو كوم وموظفين خدمة الزباين عنا بمقاسم الانترنت كوم.. إذا بتقول لواحدن صارت هزة أرضية عنا وانقطع النت بيقلك المشكله من عندك اطفي الجهاز وشغلو يا مهضوم..

وبعيدا عن الهزات الأرضيه.. بتتصل بتشتكي عن سوء خدمة النت يا محترم.. بيقلك فني المقسم..

اخي المواطن حط الفلتر.. بتقلو لك يا أخي في فلتر.. بيرجع بيقلك طيب شيل القلتر.. فبتجاوبوا.. يا أخي شلتو وحطيتو وحطيتو وشلتو..

بيجاوبك بكل احترام وتفهم واهتمام.. طيب طفي الراوتر وشغلو بعد ربع ساعه.. فبترد عليه طيب أي وازا ما أجا يا جماعه..

بيقلك بكل هدوء إي معناها رجاع حط الفلتر.. و شي ربع ساعه طفي الراوتر

وارجع شغلو وحبتين انطر..

وبتمضي الربع ساعه.. وانت عم تراقب وتسمع صوت تكات الساعه..

بترجع بترن وبتقلو ألو إي ما زبط.. فبيكون الجواب حاضر.. عراس لسان الفني الماهر.. لك اخي من عنا ما في مشاكل.. المشكلة بالفلتر او على خطك الارضي مع المي أو الكهربا في تداخل..

فالحاق خطك وشوف.. اذا نازل عليه كهربا او مي وهالشي مألوف..

وانا من هون رح ارجع ساويلك ريفرش لبوابتك.. مع طبشة تلفون من العامل مع إنو على إدنك لساتا سماعتك.. إي شو إحترام.. الله وكيلكن شي رفع عالتمام..

وبيبقى نتنا عايش على اعادة التشغيل.. وبيبقى نت بلدنا قصتو قصة وحكايتو جرصة.. وسيدي المواطن ما في مجيب .. بس في اخد من الجيب..

الديك الفصيح

اظهر المزيد

مقالات ذات صلة

زر الذهاب إلى الأعلى
إغلاق
إغلاق