الديك الفصيح

مونولوج…شو بعدك ناطر ما بتسافر؟؟؟

|| Midline-news || – الوسط 

أنا = شبك عم تقاتل دبان وجهك
هو = ساعتين واقف ناطر دوري بالمصرف وما عم يمشي الدور
أنا = أي طول بالك ..طالما فيه دور معناها بيجيك .
هو = بس ما عم يمشي هالدور من ساعتين وأنا ناطر وكل شوي بيفوت واحد بيخلص شغلو وبيمشي .
أنا = بيكون أخد دور قبلك
هو = لا يا صديقي يبدو هاد حاجز دورو على التلفون بس يجي بيفوت مباشرة والموظفين بيكونوا حاجزين ادوار وهمية مشان الواسطات ويستفيدوا
أنا = لا ولو مابيصير تتهم الناس جزافا ؟
هو = جزافا قلتلي ..؟ ما أنا شايف بعيوني كل شي
أنا = طيب فوت اشتكي للمدير أو للمسؤول عن الدور في المصرف
هو = فتت اشتكيت ..بتسمع السمفونية الوطنية الإعلامية ..ما منقبل واسطة بس يجي دورك بتفوت ..وهاد الدور ما عم يجي شكلو مكرسح متل المستقبل بها البلد لانو كل الشغل بيمشي من تحت الطاولة ؟
أنا = ليك مابدي نظر عليك ..انا كان عندي شغلة بدائرة حكومية ووضعي كان متل وضعك أخدت دور ونطرت بس ياحسرة عم ننتظر سراب ..رحت لعند البواب وسألتو مطولين ؟ قلي ما بعرف إذا بتلحق اليوم؟..قلتلو شو دية الفوتة لجوا وتمشاية المعاملة ؟..قلي 2000 ليرة قلتلو هينة ما رح أرجع يوم تاني دفعت ومشيت بربع ساعة .
هو = اي شو يعني لازم أعمل هيك وأدفع ؟
أنا = أي شو عليه !
هو = هيك منكون عم نشجع الفساد !
أنا = ليك لا تكون متل الحكومة وتحكيلي شعارات وعناوين خليك واقعي أنت أبن البلد
هو =شويعني ؟
أنا = ليك ..بالنهاية هاد موظف راتبو /30/ أو /40 / أو حتى ياسيدي يمكن /50 /ألف ليرة .. هيك عم تعطيه الحكومة وأنت شايف الوضع والغلاء الفاحش والدولار والبنزين وآجار السرفيس والتكسي واللذي منو.. يعني إذا ما أخد منك ومني من وين بدو يطعمي ولادو أو يأمن آجار الطريق لينزل على وظيفتو أو آجار بيتو اللي أعلا من راتبو ؟
هو = بس أنا موظف متلو وراتبي متلو يعني نحنا بالهوا سوا ؟
أنا = أي أعمل متلو .. وكل واحد بياخد من التاني اللي بالهاتف بياخد من اللي بالكهربا واللي بالمياه بياخد من يللي بالنقل ويلي بالنقل بياخد من شوفير التكسي وشوفير التكسي بياخد من المواطن وهيك دواليك عم تدور عجلة الاقتصاد الوطني والتنمية ؟ وكلنا مناخد من بعض ومندفع لبعض ؟
هو = شو عم تحكي ..اخي مافيي اعمل هيك ؟؟ هاد فساد ورشوة ما رح كون جزء من هالمنظومة اللي دمرت البلد ووصلتنا لها الحرب الكارثية اللي عم نعيشها اليوم ؟
أنا = هلق معك حق بمأنو الفساد وصلنا لهون ولها الحرب ..بس أنت بتعرف أنو الفساد زاد واستشرى وصل لناس بالأصل ماكانت فاسدة لأنو الفاسدين الكبار اللي كانوا قبل الحرب سرقوا مصاري البلد وانشقوا أو هربو لبرا ..واللي متلنا فاسدين بحكم الحاجة أو فرضت عليهم سياسات حكومتهم أنن يتحولو للفساد ليقدروا ياكلو خبز وفيه فاسدين كبار عم يديروا اللعبة ليوصلونا لحرب جديدة إذا نفدنا من هي ..
هو = خيو معناها خليني ناطر دوري ما عندي حل لأنو ما معي مصاري لأدفع رشوة يادوبك حامل آجار الطريق .
أنا= انتطر يا صديقي انتظر .. سمعان بأغنية ملحم بركات ..شوبعدك ناطر عالمقعد ناطر ما بيسافر…
هو = أي سمعانا بس ماقادر سافر ؟؟
أنا =أي خليك ناطر لاتتذمر ولا تسافر .!!!!!!!!!!!

اظهر المزيد

مقالات ذات صلة

زر الذهاب إلى الأعلى
إغلاق
إغلاق