الديك الفصيح

لوَرَا يا أمُّور.. حتى تمشي الأمور..

|| Midline-news || – الوسط …

 

لَوَرَا.. لَوَرَا.. لَوَرَا..

كَم مَرَّة أعزائي المواطنون, هَدَّدَكم سائق التَّايتَنِيك الميمون, بأنُّو ما رَح يمشي إذا ما رْجِعِتْوا لَوَرَا..

فًـ لَوَرَا.. ارجَعُوا شويّ لَوَرَا.. النِّدَاء الخالِد والأبدي .. لَشوفير باص النقل الداخلي النكدي..

وكِل ما وِصْلِتْ التايتَنِيك لَمَوقِف جديد بينزِل عدَد من الركَّاب مَا بيتجاوَزُوا أصابِع الإيد الوَاحدِة.. لَيطْلَع بَدالُون عَدَد بيتجاوَز أصابِع الإيدِين والرِّجْلِين سَوا ومن الشكوى ما في فائدة..

وبيَرجِع الصَّوت الهَادِر.. لَوَرَا يا شباب.. لَوْ سَمَحْتُوا, ارجَعُوا لَوَرَا يا أحباب..

لك يا عَمِّي بيكُون طالِع معَك ناس.. مَعُون مشاكل صحية ويا دوب عم يلتقطوا الأنفاس.. ومَع هيك, يا شَبَاب لَوَرَا.. ارجَعُوا شويَ لَوَرَا..

بيرجَع الصوت لَيهَدِّد ويتوعَّد .. والله ما بِمْشِي لَتِرْجَعُوا لَوَرَا.. بيعتِرض بعض الركَّاب هَالمَرَّة والصوت بيتردد.. وين بدنا نرجَع؟؟, صارت الناس بضَهِر بَعْضَا يا كدع؟؟

وبيحتدم النقاش بين الركَّاب والشوفير..

طبعا الركَّاب على حَقّ لَإنُّون مانُون مَكدوس.. والشوفير مَعُو حَقّ لَأنُّو في أزمة نَقِل وفي ناس بتكُون ناطرَة الباص لَساعة وأكتَر وحَقُّون يركَبُوا بعد ما تعبت منن الأجساد والنفوس..

لأ والموضة الجديدة, بيقلَّك الشوفور هاد الموجود وما عَجَبك إنزِل يا أمور..

بس والله الحق عَالصِّين يعني ليش ماعِمْلُوا مَكابس بالباصات.. بيضغَط الشوفير الزرّ فالناس كلَّا بتنكِبِس لوَرَا يا حضرات..

ولحل هي الأزمة وزارة النقل السورية وعدت بألفين باص نقل داخلي .. وعالوعد يا كمون .. وكل يوم, بيقولوا اليوم..

لك والله والله لو باعتين الشوفيرية مشي ليجيبوهن من الصين.. كانوا وصلوا ورجعوا من زمان واستراحوا وريحوا..

بس 2000 باص بشوارع سورية ومنن 200 بشوارع الشام.. بوقت ما في مكان لدولاب جديد شي ممتااااز وهيك بتسكر البلد تمام .. وسلم يا سلام..

بس نو نو نو, انا ما برضى تحلولنا أزمة النقل.. لأنو رح توحشني أيام المطاحشة.. و الدعوسة عالصبابيط و الركبة جاثيا ومنبطحا وواقفا والمدافشة..

رح اشتاق لأيام النطرة عالموقف .. ورح اشتاق لاحاديثي الجانبية انا و الواقفين اللي بعرف منن واللي ما بعرف..

لما نقعد نحكي ونشلي .. و نتعرف عبعض ونرغي.. ونختم الحديث بجملة الله يفرج أحسن شي..

الديك الفصيح

اظهر المزيد

مقالات ذات صلة

زر الذهاب إلى الأعلى
إغلاق