الديك الفصيح

لك إيْ البطاطا ب٥٠٠ , ومع هيك لسَّاتا رخيصَة….. لإنُّو مَزروعَة بتْرَاب الوطَن , وتْرَاب الوطَن غالي يا صَفِيِّة

|| Midline-news || – الوسط …

 

البَطاطا بـ 500 ليرة وبَس.. يا بَلاش والله..

الأسعار عَم تنِطّ بالسوق قَبِل شهر رمضان الكريم والمواطن متل اليتيم على طاولة المسؤول اللئيم..

واحِد من أصْحَاب المَحَلَّات قال إنُّو كَمَان, أسعار الفَرُّوج النَّيّ عم تعاني من قفزات, ونَطِّتْ 16% بالفترة الماضية..

ارتفاع أسعار الفرُّوج, قالت عنو صاحبة المقام الرفيع والكلام البديع.. وزارة التجارة الداخلية ذات الطلعة البهية, إنُّو سَبَبُو زيادة نَفَقَات التدفِئَة والأدوية.. ومُستَلزَمَات التربية , وارتفاع كِلْفِة تَربية الصِّيْصَان.. بفَصِل الشِّتَا الي انوعدت فيه كون دفيان.

ونَفِتْ إنُّو يكون التهريب هُوِّي السبب.. وصب عمي صب التهريب صاير كب..

وكِلّ سنِة بيعانِي المواطن السوري ارتفاع الأسعار , لمَّا يشمُّو ريحِةْ وصُول شهر رمضان الكريم هالتجَّار..

لك إيْ البطاطا ب٥٠٠ , ومع هيك لسَّاتا رخيصَة.. لإنُّو مَزروعَة بتْرَاب الوطَن , وتْرَاب الوطَن غالي يا صَفِيِّة..

بس شُو الجديد بالموضوع؟؟؟ .. كِل سِنِة نَفْس القِصَّة , مَع إنُّو رمَضان شهر الخِيْر بس شكلو صاير غير.

لازِم الأسعار تنَاسِب كِلّ فِئَات الشِّعِب.. الِّي أغلَبُو صار تَحِت خَطّ الفَقِر بأتُّوسِة واللهي يا رب..

لك رُوحُوا.. نَار وزِيت حَار , والله لَا يشبِعْكُون يا تِجَّار..

وإخوتِي المواطنين , عَلَيكُم بالخِبِّيزِة , طَعْمُهَا لذَيذ ومُتَوَفِّرة في الحدائق والبساتين , ليسَ عليكَ سِوَى إحضار كيسٍ فارغ لِتَمْلَئَهُ من تلكَ النَّبْتَة اللَّذيذة , وشكرا.

يلَّا كلُّون كَمْ يوم , ومنصِير نسأَل , أدِّيش عيار البطاطا اليوم؟؟؟؟

الديك الفصيح

اظهر المزيد

مقالات ذات صلة

زر الذهاب إلى الأعلى
إغلاق