الديك الفصيح

قرارات قرارات قرارات, من السورية للاتصالات.. والمطلوب سحب الفلوس من الجيوب

|| Midline-news || – الوسط …

 

قرارات قرارات قرارات من السورية للاتصالات.. والمطلوب سحب الفلوس من الجيوب.. لك شو عامللكن المواطن.. إذا المسكين حاطط همو بالجرن وكانن..

فالشركة السورية للاتصالات يا سادة يا حضرات.. كشفت إنو عدد مشتركين التلفون الأرضي والمشتركات.. كل سنة بيزيد 70 ألف مشترك ومشتركة.. وهوي رقم عادي للاشتراك بالشركة.

خاصة إنو الناس عم تعتمد حاليا على أجهزة تانية.. متل مواقع التواصل الاجتماعية.. وحالات استعمال المواطن للخط الأرضي كتير قليلة ومنا قوية..

وقالت الشركة إنو في قرار برفع أجرة تركيب خط التلفون الأرضي.. لـ 4500 ليرة سورية بعد ما كانت بالفترة الماضية 2500 ليرة إي والله قليل بحضي..

يعني الزيادة ألفين ليرة.. ليرة تنطح ليرة..

الاتصالات أكدت إنو سبب ارتفاع الأجور هوي ارتفاع أسعار أشرطة النحاس وتكاليف التركيب.. عرفت شلون يا حبيب..

وذكرتنا الاتصالات.. إنو سلك النحاس بيكلف من العلبة لبيت المشترك 5 آلاف من الليرات..

أيوا كشفتو حالكن بحالكن.. ومني ومن المواطنين السورين مو نيالكن..

شو منشان إنو طول عمرو عامل تمديد التلفونات.. ما بيجيب كبل من الشركة وبيقوللنا إنو نحنا لازم نشتري الشريط ونتك بهالليرات.. لا و وفوق هالشي بدو اكراميات..

فإذا بالاساس الشريط عم يشتريه المشترك لان الحجة دايما ما في شرطان.. يعني بيدفع حق الشريط و بيشتريه كمان..

والنتيجة بيضل عند الشركة بكرات وبكرات.. من الأشرطة والكابلات.. فوين عم تروحوا فيها يا حضرات..

ثم عن جديد إذا علبة التلفون على مدخل البيت وجاهزة.. وصاحب الهاتف عم يشتري الشريط المذكور للبيت يا اتصالاتنا الجامدة.. فليش رفع السعر بالأساس.. واستنزاف جيوب الناس..

لك والله والله صار نفسي شي مرة اسمع انو شي نزل سعرو بهالبلد ولو بالمنام.. بس شكلو حلم وسلم يا سلام..

ما في غير النت بتنزل سرعتو.. وخود على تغميز لأنو متل غماز السيارة ضوي وشغل وشغل وضوي حضرتو.. والله وكيلكن النت والاتصالات عنا بسورية.. ما فينا نقول غير على الله أوضاعو خليها.. لأنو بيخليك تروح لعند صاحب المنشور عالفيس مثلاً لتقلو أعجبني منشورك وترجع.. لك ربٌ يُعبد.. واتصالات تُحمد.. عرفتوا شلون..

الديك الفصيح

اظهر المزيد

مقالات ذات صلة

زر الذهاب إلى الأعلى
إغلاق
إغلاق