الديك الفصيحالعناوين الرئيسية

فرط نشاط حكومي .. “يُـثـيـر القلق” ..

|| Midline-news || – الوسط …

 

  • خير اللهم اجعله خير  .. شبك لك ديك من الصبح عم تقرقر وتهز براسك يمين وشمال !؟

عم قرقر اليوم  لسببين .. التاني باقي ومستمر أما الأول شغل هالأسبوع

  • وليش ذكرت التاني قبل الأولاني ؟

لأنه  السبب الأهم للقرقرة ..

  • شلشتني على فكرة .. وقف قرقرة وخبرني

يا صاحبي .. السبب الأولاني أن وزرا الحكومة صرلهم كم يوم، وعلى ما يبدو رح يستمروا لحين انتهاء جدول الحضور بالدور  للاجتماع  مع الصحفيين بهدف سرد انجازاتهم في العام المنصرم وخططهم في العام الحالي.

  • حلو هالكلام .. شو اللي مو عاجبك بالقصة ؟

ثلاث شغلات ..

الأولى وهي أنه غير مصرح للصحافيين الحاضرين الخروج على أداب حضور هكذا اجتماعات وإحراج الوزير بأي سؤال أو استفسار خارج ما يريد الوزير طرحه .

أما الثانية  فهي ان هنالك معلومات وكلام مهم يقال في هذه الجلسات لكن للأسف ليس للنشر .

نصل إلى الثالثة كنتيجة طبيعية وهي أن الصحفيين بغالبيتهم في نهاية كل اجتماع حسب ما سمعت أنا وعم نكوش بالحواكير المحيطة بمكاتبهم و”هواتفهم” مو شايفين اي معنى او جدوى لهذه الاجتماعات سوى أنها فرط نشاط حكومي المطلوب من الإعلام استيعابه ومواكبته .

  • حسبنا الله ونعم الوكيل إذا صحيح هالكلام .

له يا طيب .. شكلك عم تشكك بمعلوماتي !.. على كل حال فيك تتابع الإعلام وتشوف شو بده يحكي عن هالاجتماعات وبعدها إذا بتحب ارجاع لعندي .

  • تكرم .. رح انتظر شو بينشر الإعلام عن هذا النشاط المفرط اللي عم تحكي عنه .

ما يُثير القلق يا صاحبي مش فرط النشاط .. ما يُثير القلق أن يكون هذا الفرط  في النشاط مشابه لما يحدث عند بعض الأطفال في سنينهم الأولى بحيث يكون عندهم  فرط نشاط  يترجمونه بتحركات كثيرة ومكثفة وبشكل عشوائي وارتجالي وغير منظم ومؤذي في بعض الحالات، ويكون مُرهق للأهل ومُكلف ونتائجه أحياناً  “مُرعبة” وسلبية على االطفل والأهل والبيت .

  • فهمت عليك .. فهمت عليك .. الله يهدِّي أعضاء الحكومة ويُهديهم إلى سواء السبيل .. قادر يا كريم .. بخاطرك ..

لك وين رايح .. ما سألتني عن السبب التاني للقرقرة تبعي ؟؟

  • والله طوشتني وخليتني إنسى أول الحديث .. هات خبرني شو هو السبب التاني

السبب التاني أني ناوي افتح قن “الكتروني” ..  ومحتاج لا حكم عليه .. وفهمك كفاية  ..

اظهر المزيد

مقالات ذات صلة

زر الذهاب إلى الأعلى