الديك الفصيحالعناوين الرئيسية

غريبة ليش هيك في ناس عم تشحد؟

|| Midline-news || – الوسط …

 

جوعان أمانة طعميني.. هيي وحدة من العبارات الي بتسمعا لما تمر جنب وحدة من حدائق دمشق يا عيني.. وبتلاقي أطفال وكبار حاطين كرتونة وقاعدين بالطريق.. وبتحس بعضن بيطير من الفرحة لما تمد ايدك على عبك وبيسيل منن الريق.. وبعضن بتحس بعيونن نظرات انكسار وكأنوا هالكم ليرة الي عم تعطيهن ياهن هنن القشة الي رح تنقذ الغريق..

اما بالكواليس فبيرجع بعض الأطفال لبيوتن بالليل يا عيني بالليل ليسلموا الغلة لأباؤن الي بعضن فعلا ضاقت فيهن الحال والأعمال.. فما ضل قدامن غير يشغلوا أولادن بالتسول واستجداء عواطف الناس ليكتسبوا ما يسد الرمق من اموال.. بينما بعضن الآخر فبتلاقيهن راجعين باخر الليل لبيوتن بشي حي من أحياء دمشق.. الي ما بيقدر بعض الميسورين احتمال تكاليف العيش بشقة فيها بعد ما صار كار الشحادة مهنتن المفضلة باعتبارا وحدة من أكتر المهن دخلاً بالبلد بعد ما عندن شرش الحيا طق..

وبعد ما قاللنا احدهم انو التسول بالشام.. صار ظاهرة شبه معدومة يا سادة يا كرام.. كشفت مديرة مديرية الخدمات بوزارة الشؤون الاجتماعية.. عن القبض على 500 متسول بشهر رمضان بالسنة الحالية.. بوقت أكد فيه مدير الشؤون الاجتماعية والعمل شوقي عون انو هالظاهرة عالمية.. وموجودة حتى بالمجتمعات المتطورة والتقدمية.. واعتبر انو مساعدة المجتمع للشحاد.. بيزيد من انتشار هالظاهرة وبيأدي لاستمرارا بين العباد..

مدير الشؤون الاجتماعية بدمشق شوقي عون قال انو أكتر الشحادين.. للإقامة بمراكز الإيواء وتلقي المساعدات من بعض الجمعيات رافضين.. أما ليش يا حلوين؟.. قال لأنو الشحاد الي بتوصل يوميتو لحوالي 35 ألف ليرة.. ما بقا يرضى بأقل منن والشحادة مهنة ما بقا يقبل غيرا..

محسود عمو الشحاد محسود.. وصدقا 35 الف باليوم للمتسول مو من قيمتو.. وعنجد عنجد الديك بلش يفكر يستقيل ويشتري حصيرة وسلة وقمطة ويشحد بلكي بتتحسن معيشتو.. ولأنو طريق الألف ميل بيبدأ بخطوة فرح يبلش يخطط لمستقبلو ويستلملو شي إشارة بشي شارع جانبي.. و بكرا الله بيكرمو و بيفتح فرع تاني وتالت عند أهم إشارات المالكي..

وللأسف يا سادة أكتر شبكات الشحادة بحسب عون عائلية.. لانو تبين أنو أغلبية الشحادين أخوة وأهلية بمحلية..

بس غريبة ليش هيك في ناس عم تشحد يتساءل الديك وليش كترانين المتسولين والمتسولات.. مع انو الأسعار رخيصة والمعاشات بتزيد عن الحاجات.. وعم نصمد منا لنصيف كل سنة بأوروبا هاد غير انو فاضيه ومتوفرة المواصلات.. و الاهم من هاد كلو انو ابن فلان وابن المعتر الغلبان بيدرسوا بنفس المكان وما في تفريق بينهما الاثنان.. كل هاد وفي ناس عم تشحد؟..

عموما منشان تعرف ليش عم نشحد انزل امشي بالشارع 10 دقايق لتشوف قديش خدماتنا قويه.. وشوارعنا جنيفيه.. وزبالتنا جبال وتلال.. وحالنا يا عمي صاير حال.. بيكفي ولا هالقد تمام وعال.. يلا ما رح كفي لأنو بيكفي.. من يوميات مواطن معتر ومحتار ما عندو غير سوريه خيار.. وبلا ما نزيد نعيد.. نقطة سطر جديد..

الديك الفصيح

اظهر المزيد

مقالات ذات صلة

زر الذهاب إلى الأعلى
إغلاق
إغلاق