الديك الفصيحالعناوين الرئيسية

عالمستقبل رايحين .. مضطربين بالملايين ..

|| Midline-news || – الوسط …

 

مديرية صحة القنيطرة قالت على لسان رئيسة دائرة البرامج الصحية.. إنها عم ‏تدرب ٢٥ دكتور صحة نفسية..

وطبعا برنامج التدريب اعدتو منظمة الصحة العالمية.. لتنمية ‏قدرات مجموعة كبيرة من العاملين بمجال الرعاية الصحية.. من غير ‏الاختصاصيين من الأطباء البشريين..

وكشفت رئيسة دائرة البرامج الصحية.. انو في بسورية ٣ ملايين شخص بيعانوا من اضطرابات نفسية..

له له 3 ملايين مضطرب بس.. بتوقع منقصين رقم تنين جنب التلاتة لان ما تبقى من الـ ٢٣ مليون سوري ما عندن نفسية لتضطرب اصلا وعم يرقصوا عالوحدة ونص.. بلا طبلة وبلا دف.. وكأنن أكلين مية كف..

قال 3 ملايين مضطرب قال .. بس انو شو السبب يتساءل ديكنا الفصيح المبجل؟..

غريبة ليش هيك شعبنا مقت.. ودايما بيندب حظوا الزفت.. مع انو الأسعار رخيصة والمعاشات بتزيد عن الحاجات.. وعم نصمد منا لنصيف كل سنة بأوروبا.. هاد غير انو المواصلات متوفرة وفاضيه والديك وانتو عالشرط وقرب يا حباب وجربا.. ناهيك انو الأمن والأمان بمستوى عالي واختو لهداك الساعه ٣ بالليل عم تطلع من بيتا وما حدا بيتعرضلا.. كل هاد وشعبنا نفسيتو تعبانة.. وعقلاتو خربانة.. ليش بقا..

لك اخي المواطن فهمني ليش الاضطرابات النفسية.. والكهربا ما بتقطع والنت من أحسن ما يكون وسرعتو متل الطلقة الروسية.. و الاهم من هاد كلو انو ابن فلان وابن المعتر الغلبان بيدرسوا بنفس المكان.. وما في تفريق بينهما الاثنان..

اه هلأ عرفت ليش مضطربين الاخوة المواطنين يمكن لأنن عم يلعبو ببجي من 8 سنين..

لك آااااخ مضطربين ومع هيك بنفصفص بزر مع كاسة شاي وبنزت نكته هون و نكته هون وبنرش عالموت سكر.. عنجد عنجد حكومة تُشكر

ديك الوسط الفصيح

اظهر المزيد

مقالات ذات صلة

زر الذهاب إلى الأعلى
إغلاق
إغلاق