العناوين الرئيسيةحرف و لون

“شاب وما قلّي” .. د.إبراهيم شحرور

اللوحة: ريما الزعبي

|| Midline-news || – الوسط
.

قلّي الهوا :
“لمّا بْصير كْبير
حالف مَ خلّي غصن بالبستان
وْعا قدّ ما رح زعّل عْصافير
بعمل عصي تا فرّح العميان …
وْلو ضلّ في عندي حطب بيصير
حلم الدفا عَ مْخدّة البردان “
وْقلّي الخشب :
“لمّا بْصير كْبير
بيصير فيّي روح عَ النسيان …
ياما بصدري انْدقّت مْسامير
ودمّي بقي مْعلّق على الصلبان
والنهر غسّل غلطة الإنسان “
وْقلّي النهر :
“لمّا بْصير كْبير
منطوّل السهره أنا وْنيسان
وْمَ بْعود إنزل عالبحر بكّير
مَ البحر مش قدّ الزهر عطشان “…
يا ريت قلبي كان بعدو زغير
طالع عَ بالي إسألو لو كان
طالع عَ بالو يصير …
قلب كْبير …
.

*د. إبراهيم شحرور – شاعر من لبنان
*ريما الزعبي- فنانة تشكيلية من سورية

اظهر المزيد

مقالات ذات صلة

زر الذهاب إلى الأعلى