الديك الفصيحالعناوين الرئيسية

سعر الدولار في سوريا .. تحويل الوهمي إلى رسمي ..

|| Midline-news || – الوسط …

 

المصرف المركزي أصدر قرار, يا شطار, حلو كتير , لدرجة خلالي عقلي من منطقو “أي القرار” يطير.

في نشرة البدلات اليومية, الخاصة بتطبيق تعديلات مرسوم دفع البدل للخدمة الإلزامية, سواء بالليرة السورية, أو بالعملة الأجنبية, حدد المركزي سعر الدولار بـ “2550” ليرة، ليرة تنطح ليرة, وهالسعر ببساطة هو سعر السوق السودا هيك من الآخر وعبلاطة, بينما اذا اجتك حوالة يا أمور, فلازم تقبل بسعر صرف 1256 من المركزي حتى تمشي الأمور.

يتساءل الديك الفصيح، طيب ليش هيك!؟, فيجيبه صوتٌ من السماء “: هنن بيعرفو مصلحتنا ما تهز بدنك مشان الله يا بيك .. قصدي يا ديك ..

يعود الديك ليسأل, طيب بلكي في تفسير منطقي من حكومتنا الحنونة ؟ .. فيجيبه الصوت: لك لا .. لا .. هنن الجماعة عم يعملوا هيك من باب المونه.

شيزوفرينيا نظامي, ولا تقصر وتطول وتنط وما تحط وتقلي انو المركزي حرامي, لأنو في كتير دول بالعالم عندا سعرين رسميين للدولار, أكيد هيك رح يطلع شي جهبذ من جهابذة ماليتنا ليقنعنا وبإصرار, لانو جكومتنا ما بتعمل شي إذا ما كان بمعايير عالمية, وأكيد بتذكروا التصريح تبع إنو شوارعنا جنيفية ومواصلاتنا كتير قوية, لأنو نحنا بنمشي عالستاندرات العالمية.

طيب يا حبايب .. إذا كان المركزي الي هوي قيّم على حماية عملتنا, عم يسعر دولار البدل على حسب سعر السوق السودا فعلى قولة إخوتنا المصاروة // يا وكستنا // .. فمين المسؤول عملياً عن رفع سعر الصرف؟, الحكومة الحبابة أم التجار بالغي الظرافة والطرافة !؟ ..

ببساطة هالمنطق بيقول هوي صحيح نحنا دولة .. بس لما بدك تسددلنا بالسوري بنصير سوق سودا .. وإلنا صولة وجولة.

طيب .. كيف بيعاقب المركزي الي بيتعاملوا بغير الليرة السورية, وبيقيس حالو بغير مسطرة وبيخرق القانون متل قطاعين الطرق والحرامية !!؟ , لأ وشو وبيجبي البدل بحسب سعر السوق السودا وبقرار رسمي!!, يقول مواطنون للديك الفصيح لك خراس .. حقه يا عمي حقه .

قرار المركزي يا سادة اعتراف رسمي, بإنو سعر صرفه للدولار هو اللي كان وهمي, قرار المركزي بيدحض كل التصريحات السابقة الرسمية, عن القيمة التضخمية الوهمية لسعر الدولار يا محللاتية, وبيثبت كمان انو هالتصريحات كلام بالهوا وكتير وهمية, واعتراف بقيمة التضخم الحقيقية, وبحقيقة التصريحات الحكومية الوهمية ..

وهالقرار يا سادة بظني أنا الديك الفصيح .. وبعضُ الظن ليس إثم .. يعني إنو سعر الصرف بالسوق, ما رح يقل عن 2550 ليرة من هلأ ورايح .. لأ ولفوق .. وهالقرار بيعني يا سادة إنو سعر صرف السوق السودا رح يتضاعف, وبالتالي غلا جديد ومضاعف, والله يعينك يا مواطن شو بدك تلقى لتلقى, موتة وعصة قبر وعيشة عم تنسرق منها الروح سرقة.

عموما الديك الفصيح حقيقة معجب كتير بأداء المصرف المركزي, أما ليش فلأنو كلو حركات وإلو بصمات كبيرة ومميزي, إنو زمان لانو كنا كتير هيك مالين, الليرة ثابتة والدولار حزين, أما هلأ ويا سلام على هلأ, الليرة غير, والدولار مع المركزي رح يطير ويعلي كتير, كتير كتير.

بيبقى الثابت بكل الي عم يصير إنو المواطن السوري هوي الي عم يدفع الثمن وبسعر السوق السودا .. هي فرقا وزودا ..
عنجد شي بيحط العقل بالكف معلم من الآخر حطولنا بمية الفيجه اسيد خلينا نخلص.

كوكو كوكو كوكو .. لك يا ديك !؟ .. وين رحت !؟..

لك إجو إجو.. وي وي وي وي  ..

لك مين اللي إجوا !؟..

لك هنن .. وي وي وي وي  ..

وهنا .. صمت الديك المستباح عن الكلام المباح .. وشكلهن شحطوه .. ريحوه وارتاح ..

تابعوا صفحتنا على فيس بوك.

اظهر المزيد

مقالات ذات صلة

زر الذهاب إلى الأعلى