الديك الفصيح

زيادة المعاش في غرفة الإنعاش … وعيش يا .. مواطن ..

|| Midline-news || – الوسط …

 

لا تفكر ولا تحتار .. الراتب بجيبتك صار .. قسم اطرح اجمع واصرف كلو الراتب كم دولار .. الرزقة بتيجي والمصاري بتروح وما بترجع , وكلشي حواليك متل المنشار .. طالع واكل .. نازل واكل .. والجيبة فاضية عالآخر.. والراتب يا سادة يا كرام .. قصتو قصة وحكايتو جرصة .. وما حدا بيعرف مين الي داعي عليه روح الله لا يكبرك..

وللأسف صرنا بوطن مات العقل فيه تحت عمامة شيخ ومسبحة كاهن وتصريح مسؤول .. بيلعبوا بالوطن والمواطن والعقول.. وصرنا مشتاقين نحن الفقراء إلى الصلاة على رغيف الخبز وصحبه اجمعين.. مشتاقين لحياة غير هي الحياة، ونعود ننتظر الحياة مهزومين..

بيقول رئيس حكومتنا العتيدة .. عماد خميس انو زيادة الرواتب لن تكون بعيدة.. يا سيدي ترونها قريبة ونراها بعيدة

بيعيد ويزيد السيد خميس انو في رؤية لزيادة الرواتب بشكل نوعي وليس عام.. أي ماشي تمام هالكلام..

خميس من كذا شهر قال انو في مفاجأة قريبة بخصوص زيادة الرواتب.. ما شالله كل تصريحات المسؤولين موزونة بس شر البلية ما يُضحك ويُبكي فيُدمي يا حبايب..

عموما هاد الحكي كلو مش مهم عند المواطن عطوه الزبدة وقولولوا انو في زيادة.. او حكي عالفاضي متل العادة .. وبيكفي لعب بآعصاب المواطنين والمواطنات.. السكوت احسن من بيع الكلام لان الناس شبعت فلسفه وشعارات .. والمواطنين بانتظار الزيادة من سنين .. منهم من قضى نحبه ومنهم من ينتظر وما بدلوا تبديلا يا مؤمنين..

زيادة الراتب ناس بتاكدا وناس بتستبعدا ، ناس بتتوقع تطلع قريباً ، وناس بتشوفا حلما بعيدا.. وبرغم الاختلاف بالاراء فالكل مجمعين انها لازم تكون عالاقل خمسين بالميه .. حتى تلبي للمواطن حاجاتو الأساسية..

لانو الرواتب والأجور خسرت بسنين الحرب بين 80 لـ 90% من قيمتا الشرائية، وصار أكتر من 90% من السوريين تحت خط الفقر بشويه.. لهيك صارت الزيادة واجبة وضرورية .. ولازم تترافق مع ضبط الأسعار ليكون الها أثر عالقوة الشرائية..

وبرغم الاشاعات صعب نتكهن انو رح تكون اشاعة زيادة الراتب هالمرة حقيقية.. لانو الوعود بالزيادة مستمرة من سنتين ونسمع جعجعة ولا نرى طحين.. ومسؤولينا على كل شي متفقين .. بس عند مصلحة المواطن منقسمين..

وللاسف اقتصادنا وصل لحالة أشبه بالموت السريري ضعف اقتصادي كبير وسعر الليرة فلتان .. وكل مالو بالنازل كمان .. هاد غير انو بمجرد ما يسمعوا باشاعة زيادة الراتب هالتجار بتحلق الأسعار..  وبتنط وما بقى تحط وعالريحة ريالة التجار بتشط..

لهيك مطلوب من الحكومة تلاقي طريقة ذكية.. لرفع الرواتب مع ضمان تثبيت الأسعار بشكل بيحقق العدالة وبيامن الحد الأدنى للحالة المعيشة، علما انو الحد الأدنى لدخل الأسرة المتوسطة ما لازم يقل عن 350 ألف ليرة وهالكلام بحسب الاحصاءات الرسمية..

وللتذكير بس ببداية السنة جمال القادري رئيس اتحاد نقابات العمال.. طلب من وزير المالية مأمون حمدان يكون مرن فيما يتعلق بزيادة الحوافز للعمال ..  ويحل زنارو شوي لأنو نَشَف القضية على الآخر هيك الزلمة قال.. بارك الله فيك استاذنا القادري جمال.. بس يبدو انو حاسبين حسابن ومو حاطين زنار.. بس ازا السنة بلشت بفك الزنار لأخر السنة شو ممكن يكون صار..

وبردو على هالكلام وزير المالية مامون حمدان قال انو ما حدا بسورية جوعان.. والحكومة بتعرف انو الراتب ما بيكفي كمان.. وعندما يكون هناك زيادة رواتب، سيشعر المواطن بزيادة الراتب .. عرفتوا شلون يا حبايب..

الحمد لله طلعت جكومتنا بتعرف انو الراتب لا يكفي بس مو عجيبة من وين بيعرفوا ، وكيف بيعرفوا اذا ما بيركبوا لا باصات نقل داخلي ولا سرافيس، كيف بيعرفوا اذا ما بياكلوا خبز من افران الدولة ولا بيفوتوا على مشافي الدولة متل المواطنين المتاعيس..

كيف بيعرفوا اذا بيعلموا ولادن بالخاص من المدارس والجامعات ، كيف بيعرفوا إذا ما بيشتروا بأيديهن لا دوا ولا خضروات، كيف بيعرفوا اذا مليانة بينزين وببلاش سياراتن والمولدات .. وما عندن لا صوبية حطب ولا بيهكلوا بالشتوية هم تأمين المازوتات..

كيف بيعرفوا اذا لبسن ولبس ولادن من اغلى الماركات.. كيف بيعرفوا والمال العام سايب بين أيديهن غير العمولات والرشاوي والصفقات ، بدي اعرف مين خبرن باحوالنا.. ومين حكالن عن معاناتنا ومأساتنا..

قولتكن مين الفسفوس يلي ترك كلشي.. وراح فسفس للحكومة انو راتبنا يا دوبو حق خبز يكفي..

بكل حال يا مظلومين يا مسحوقين يا مطحونين يا طفرانين يا موظفين.. بشرفكم ما حدا يزعل الزيادة جاية و حتعيشوا معها وفيها بنعيم وحيتحول البلد لجنة الله على الأرض يعني أراكيل وجاك وبلاك ولبن وعسل ونسكافيه “لأ وسمع الديك الفصيح انو النسكافيه 3 بــ 1” والحكومة رح توزع عليكن مصاري كتير كتير.. أكتر شي يعني.. لدرجة انك من راتب شهر حتشتري سيدي المواطن علبتين زيت وعلبتين سردين وكم علبة طون وكيلو ونص طحين..

هذا وتقبل التعازي والتبريكات في دكان سمير وما حدا يسألني مين سمير اسألوا أبو ليلي بلكي بيعرفو..

اظهر المزيد

مقالات ذات صلة

زر الذهاب إلى الأعلى
إغلاق
إغلاق