الديك الفصيحالعناوين الرئيسية

حقيبة مارك و قانون الاعلام

الوسط -خاص

قاعد انا وهالديك الفصيح عم نقلب بالفيسبوك ونشهق …بلا زفير ..نط هالديك وقلي لك شوهاد ماخليتولي ولا مزبلة لصيح عليها كلو عامل صفحات ونازل سلخ بالفضايح وبقبايح هالمسؤولين ..لك دخلك بتعرفوا مين هالديوكة الي قاعدة على الصفحات ونازلة مسبات وشتايم وعزايم للايكات على فضيحة المسؤول فلان والمدير علتان …قلتلوا لاوالله …بس في تخمينات …شي بيقولولنا صفحات وهمية وشي بيقولولنا هس يمكن هي المخا …  وبعض الجهات عم تعمل شوية تصفيات للثارات بينها وبين بعض الشخصيات ومامنعرف اذا هالحكي المكتوب صحي -والعمى اذا صحي-ولك اذا صحي المفروض ينئام بلحظتها هالمسؤول ..مو ينامو على سلسلة فضايح ..صفنت شوي وقلتلو للديك …لا لا مستحيل تكون كل هالفضايح حقيقية ..اي تلت ارباعها وهمية والربع التاني بتصرف الاحقاد الشخصية …نط الديك وقلي ولك في ناس عم تطلع لايف على الفيس وتسب وتحكي ليش مابتتحاسب موعنا قانون جرايم الكترونية …
قلتلو يافصيح حاجتك غشمنة هدول من برات البلد والفيسبوك شغلة كلها على بعضها تطبيق افتراضي عم نسيىء استخدامو . متل عادتنا نحنا العرب …اساسا مو نحنا منتحكم بادارتو …هي عمك مارك ..عندو القصة كلها وهو بيسكر حسابات وبيفتحها حسب تعليماتو وقوانينو ..ونحنا مافينا نجيب هالكذابين بالانتربول ومافينا نسيطر لهدرجة على القيل والقول …بس على الاقل منضبط الامور بقوانينا الخاصة شو بدنا بلي برا ….
وماشفتلكن غير هالديك نفش ريشو وقشعر بدنو ..وبلش ينقر على زر اغضبني ..وقلي مادام الحكاية هيك فليش حضراتكن بقانون الاعلام الجديد للي عم تشتغلوا فيه ..مطروح انو بحق للصفحة الفيسبوكية الي بيتعدى متابعيها عدد معين انو تصير وسيلة اعلامية وتترخص …انا شخصيا هالديك الي مو عاجب حدا متابع رقاصة عندها فوق النص مليون متابع ..يعني اذا بتبلش تنزل اخبار بتصير هالرقاصة حسب قانون الاعلام المزمع اطلاقو حسنين هيكل ..والاحلى من هيك انو ادارة الصفحات وتسكيرها مو من عندكن يعني بيصير وزيرها..عمك مارك ..ولا يك …ليك على هالحكي

اظهر المزيد

مقالات ذات صلة

زر الذهاب إلى الأعلى
إغلاق
إغلاق