العناوين الرئيسيةحرف و لون

“تصدق يا نصر”؟ .. أسامة البنا

لوحة: د. ماجدة حمصي

|| Midline-news || – الوسط
.

تصدق يا نصر
إن احنا كُنا كُلنا كُومة غيـوم
متعلقة ف وسط السما
بعضنا اتحول رماد
بعضنا اتحول شوارع طويلة
لكن ضلمة ومُخيفـة
وبعضنا اتحول دواير وحبر سـري
لسه يا نصر بتدور عليك فينـا ؟!
تصدق يا نصر
إن معظم صحابي هُدومهـم وسعت عليهم !
ترعة وعايمين فيها !
وكإنهم ف سـباق . .
مين اللي يسقط واللي يغرق قبل غيره !
فاتحين زنازينهم بإيدهـم !
حافرين قبـور بتساع جيوش !
وانتَ يا نصر اللي لسه خايف تصيبك الدهشـة
وتكفر بالإشارة والعلامات !
تصدق يا نصر
إن الشعرا الشعرا هُمّا الناس المخطوفة م الأرض
عملوا لهم قيامة قبل القيامة
وصعود مايشـفهوش غير العُميان
وان العُزلة العزلة مش موتة ف تبوت
شـباك طالل ع الملكوت
وعرش عريض صاحبه حاطط رجله على رجل
وطالق عصافيره للعالم تحتيه
وأنتَ يا نصر عامل مش فاهم ؟!

.

*شاعر من مصر
*اللوحة للفنانة التشكيلية د.ماجدة حمصي – سورية

اظهر المزيد

مقالات ذات صلة

زر الذهاب إلى الأعلى