الديك الفصيحالعناوين الرئيسية

بيضة الحكومة مقابيل الجبانة !

الوسط -midline-news:

طار من الفرح هالديك وقعد يحسب ويقلي قديش الحكومة صارت تعطيك معاش بعد الزيادة …ياموظف ياضرسان ماعاد الك حجة بالشكوى من القلة …هي كلشي لصالحك بتروح وبتجي من وظيفتك مجانا وراتبك بعبي جيبتك وكلو مأمن حتى لو كان مقنن من الكهربا للمازوت والله انا لو محلك بقدر وفر واشتري عشر بيوت …

صفنت بهالديك وقلتلو صاير تمدح بالحكومة والله ليكونو عينوك مستشار ..ضحك وقلي لكان بعقد خبرة المنقار …قلتلو كيف هي …

قلي ولك كتر النقر والنق بيخوف الحكومة وبخليها تضبط الاسعار وترفع الرواتب ..اي مانك شايف التموين عم ينغل نغل بالبلد ويسكر هالدكاكين الي بترفع اسعارها ..
والدليل انزيل على الفيس وشوف مافي حدا الا نفش ريشوا متل الطاووس ودق على طوارىء التموين …الناس صارت شايفة مصالحها حتى لو انقطعت للكهربا وزاد التقنين ..

قلتلو الله يجيرنا من عينك ويخلي الامور على حالها صرنا نخاف من الزيادة بالوزن والاسعار والدولار ..ولهلى مو مصدقين انو الحكومة اتغيرت احوالها وشدت حيلها وبلشت تشتغل ..

قلي الديك مبارحة في جاجة مرضانة بالقن باضت وعطتك عمرها …انت شو بتقولوا عن هالحالة …قلتلو منسميها صحوة الموت .. قلي هي هي :

قلتلو فسرلي اكتر …قلي من شهرين واكتر ونحنا منسمع انو الحكومة رح تتغير ..يبدو الشباب بعيد الشر عن قلبهن حسو انو قربت ساعتهن لذلك عزت عليهن انهن يخسروا الكرسي باهانة فقالوا لنشد حيلنا شوي !!

قلتلو معقول هالحكي ..قلي ولك اي ومو بس هيك خافوا الشعب ينعدى من التظاهر الي بعيد الشر حولينا ولاعلينا ….وقلك اكتر ..هناك قرار بامتصاص غضب المواطن ..والله هيك اسمعت بحكم طبيعة عملي الجديدة كمستشار بمنقار !!

قلتلو تف من تمك اي ما سدقنا خلصنا المهم تضل جيبتنا دفيانة والله يطول بعمر الحكومة الي حابة تشتغل ..اي موناقصنا تجينا حكومة تانية وتطول لتحس انو ساعتها قربت …اي ساعتها بدنا ننطر البيضة مقابيل الجبانة

اظهر المزيد

مقالات ذات صلة

زر الذهاب إلى الأعلى
إغلاق
إغلاق