الديك الفصيح

بوقت الذروة بيرتفع عند المواطن السوري ضغط الدم..

|| Midline-news || – الوسط…

 

بوقت الذروة بيصير الحق حلم..

بوقت الذروة بيرتفع عند المواطن السوري ضغط الدم..

وبيرتفع السكري.. وبترتفع الأسعار كمانتي..

بوقت الذروة كلشي بيرتفع.. إلا حق المواطن بينخفض وبينتزع..

بوقت الذروة بتنقطع الكهربا.. وبيبدا التقنين المفاجئ بلا احم أو دستور أو مرحبا.

برغم كل الوعود والتطمينات.. من وزارة الكهربا بصيف مريح بموضوع الكهربائيات..

بوقت الذروة بيضعف الإنترنت.. وبيصير بلا معنى إلك وهو وهي وانت..

بوقت الذروة بتنفقد السرافيس والحجة تعاقدن مع المدارس الخاصة.. والمواطن ينقلق ينطر ساعات وساعات قبل ما يستسلم وياحذ تاكسي ليبتزو شوفير هالتاكسي متل البعوضة الي للدم ماصة..

بوقت الذروة بتصير فاضيه جيوب المواطنين.. وبيصير لازم المواطن الفهلوي يدبر راسوا يا مؤمنين..

بتقول الحكمة فالج.. لا تعالج..

بوقت الذروة عزيزي المواطن.. المره الجاي لما تدور على بيت للأجار لا تدور بالشوارع العريضة.. والمناطق المنظمة والآمنه والمستفيضة..

وإنما روح مباشرة لأكثر الأحياء الفقيرة.. بهواها وبميتا وبشمسا الغزيرة..

وبها الحي الفقير رح تلاقي اجرة يومك وليلتك 5000 ليرة.. وإزا كان البيت رخيص فاليوم والليلة بـ 2000 ليرة..

عضو المكتب التنفيذي بمحافظة دمشق فيصل سرور.. قال عن واقع الإيجارات إنو الحكومة ما إلا أي صلاحية بالتدخل لا بالبيوت ولا بالإجور.. أما ليش فلأنو الملكية الخاصة محفوظة بالدستور.. وبالتالي فأي تدخل بالآجارات بيشكل مخالفة للدستور يا جمهور..

واللهي مني معلق لأنو الخبر لحالو بيحكي.. قال ما دخلنا قال.. إنو إي ما دخلكن فخار يكسر بعضو.. ولا قلكن ما فيني.. رح علق.. لك عمي ليش كل شي الو رقابة الا آجار البيوت.. مع إنو أول شي لازمو رقابة..

ما بيكفي هالناس تشردت وانظلمت من الإرهاب وأحبابو .. لك والله المركب اللي ما فيه شي لله بيغرق هوي وصاحبو..

ومو قليل اللي عم يصير.. بس للأسف ما حدا عم يعتبر وما حدا حاسس بحدا والعالم عم تجرم ببعضا ولا في جنس الرحمة من اصحاب العقارات الي قبروا الفقر بهالكم سنه فوين الدولة من مصاصين دم الشعب وين.. قولولي با مؤمنين..

الديك الفصيح

اظهر المزيد

مقالات ذات صلة

زر الذهاب إلى الأعلى
إغلاق