الديك الفصيح

بطَرطوس, 200 ليرة بالسنة يا زلم, إجرِة شاليه عالبحر فهاد حِلِم ولَّا عِلِم؟

|| Midline-news || – الوسط …

 

بطَرطوس, 200 ليرة بالسنة يا زلم, إجرِة شاليه عالبحر فهاد حِلِم ولَّا عِلِم؟

رئيس مجلس مدينة طرطوس محمد زين.. قال لَو كان هالموضوع بإيدِي يا مواطنين, لَكِنِتْ لَغِيتْ كل الاستثمارات ع الشاطئ بطرطوس.. وخَصَّصْتُوا للسوريين المعترين بلا فلوس..

محمد زين, أكَّد إنُّو فِي 283 شاليه بمنطقة الأحلام.. عَم يدفَعُوا بس 200 ليرة بالسنة إجرِةْ الشاليهَات الِّي مِسْتَأجْرِينَا بطرطوس من أكتَر من 40 عام.

واستغرَب زين التعاطُف والتساهُل مع هدول المستثمرين.. من الجهات المسؤولة ومن المعنيين.. عن طَريق استثناؤُون من القرارات.. الِّي بتتعلَّق بتَعديل بَدَل إيجار الشاليهات.

زين قال إنُّو هالشاليهات, مُو عن عَبَث اسمَا شاليهات الأحلام.. لَإنَّا حلوة كتير وشي سلم يا سلام.

فَشُو هَالتواطُؤ مع مصلحة المستثمِر.. على حِسَاب الخَزِينِة والمواطن المشحر..

واللَّهِي عَال يا عَبْد العَال.. يَعني الفَقير المعتَّر بتِلْحَقُوه عَالـ100 والـ 200.. وتَاركين ملايين الليرات لَصالِح المستثمِريِن.. فمَعقُول قَصِدْكُون تشجّْعُوا الاستثمار.. وتدعموا اقتصادنا بمراعاة الحيتان الكبار.

يَعني كِرْمَال مُخالَفَات الفقراء مِسْتَعِدِّين تَعِمْلُوا كلشِي.. حتَّى لَوْ بدكُون تعدّْلُوا قوانين ومتل لمح البصر بتمرق وبتمشي..

أمَّا المُخالَفات الكبيرة.. على مَهِل بتِنْطُر منا مشكلة خطيرة..

طيب يا سيِّد زين, إنتَ ضَوِّيتْ على المشكلة.. وسِرْقِة المال العام واستغلال المناطق العامة بدا متابعة ومُساءَلة.

فَبِدْنَا منَّك الحَل, بِدْنَا نسمَع ونشُوف حلول, مو كلام على طووووول.. ومنتْمَنَّى إنَّك تنجَح بتَحصِيل حَقّ الوطن والمواطن لأن الوضع ما بقى مقبول, لإنِّي أنا شخصيَّاً , صِرِتْ ما عَم شُوف البحر إلَّا بالموبايل, لك حتى بالمَنام ما عَاد شفْتُو سيدي المسؤول..

الموضوع صار بدو جناح دبَّانة يكون جوزا أصلع ورِجِل نَملة مطلَّقة.. وشَعْرَة من دنب فارة مُراهِقَة.. لنعمل شي سحر أسود وللبحر الحبيب بهالصيف الخانق ينفتحلنا طريق ونصيب..

ولا تنسُوا كل موضوع ببلدنا صار بدو عمل سحر وشعوذة.. عند شي ساحر أو مشعوذة..

فإذا بدك تتجوز عندك, إﻡ ﺷﻜﻴﺐ ﻟَﺠَﻠﺐ ﺍﻟﺤﺒﻴﺐ.. بـ25 ﺃﻟﻒ.. ﺧﻼﻝ أﺳﺒﻮﻉ , ﺍﻟﺒﻨﺖ ﺑﺘﺘﺰﻭﺝ, ﻭﺍﻟﺸﺐ ﺑﻴﺠﻲ ﺯﺣﻒ ..

وعندك إﻡ ﺳﺎﺭﻱ ﻟَﺠﻠﺐ ﺍﻟﻤﺼﺎﺭﻱ.. ﻭإﻡ ﺭﺍﻏﺐ ﻟَﺰﻳﺎﺩة ﺍﻟﺮﺍﺗﺐ.. ﻭإﻡ ﺣﺴﺎﻡ ﻹﺣﻴﺎﺀ ﺍﻟﻌﻈﺎﻡ.. ﻭإﻡ ﺭﺷﻴﺪ للحمل واﻠﺘﻮﻟﻴﺪ.. ﻭإﻡ دﻳﺎﺏ ﻟﺸﺮﺍﺀ ﺍﻟتياﺏ.. والديك الفصيح لتريح وتستريح.. وكاسك يا وطن..

الديك الفصيح

اظهر المزيد

مقالات ذات صلة

زر الذهاب إلى الأعلى
إغلاق