الديك الفصيحالعناوين الرئيسية

سرقة الملاليم تكتيك …وسرقة الملايين استراتيجية !

 

الوسط -midline-news:

الدولار طالع ونازل والتاجر متل المنشار ماخلالنا غير قشر الخيار نجمل فيه هالبشرة وهالعيشة ..حتى الضمير ماعاد الو وزن صاير خف الريشة مع أول مطب بطير ..وكلو بصير بخلط “الزيت والمي ” ..

اي ماعاد عرفنا اذا السرقة حرام والله شايفنا.. و نحنا عم نسرق شوية شمام ومو شايف الي عم يطقش الكافيار بالشفايف ..
سالت الديك الفصيح بهالجو الي مو صحيح اي معقول  كل السرقة متل بعضها …المهم  …بيتت استخارة وغفلت عيني واجت ستي الختيارة بالمنام لافه حالها بحرام والدنيا حراقي ..وبلشت تبخ كلمات الحذر والتشديد والوعيد والامثال يلي بتغلب فيها  ارسطو وباقي والعلماء بكبر المعلاق ..بس لفتتني هذه المرة عبارة ياما قالتها وكل مرة بتمرق دون ماحللها ..قال ياستي الي بيسرق ليرة متل الي بيسرق الف ..
بس على حسابات سعر صرف الدولار الجديد اليوم لازم يصير مثل ستي انو  الي بيسرق الف متل الي بيسرق مليار ..ماعلينا قمت من النوم وانا عم اترحم عستي والليرة تبعها ..وقلت بيني وبين حالي بعد ماستي راحت وتركتني عحالي هلىء الي بيسرق الف عنجد قادر يسرق مليار
طيب منين جابوا هالمعادلة ..اذا كان الي بيسرق الف بدو يصرفها عند بياع الفلافل او الشاورما باحسن الاحوال

بس الي عم يسرق مليار شو عم يعمل فيها وليش ما بينكشف متلو متل  ها لمعتر  الي بيسرق الف ومن سوء حظو يمكن يلقطو  الوزير شخصيا ويحطوا بالحبس وصارت لاتقولوا ماصارت .. اما الي بيسرق مليار معلم بالكار بياخدهن من تم السبع الحكومي وماحدا بيحس …
وانا اكبر مثال ..بشتغل بوظيفة واذا بدي اطلع بمكرو المؤسسة فورا بيشتغلوا استشعارات المدير وبطالع من جيبتو قرار الترشيد وتخفيض النفقات والتعتير ..وبقلي بلا تبذير وشبرقه نحنا بازمة …وكانو جيبتي مابتعني الحكومة بس جيبة الحكومة لازم تعنيني ….طيب كيف هداك سرق مليارات وماحدا شافوا اي شو مارد بالقنينة …وقس على ذلك قيس ..المليارات عم تطير من جيب الحكومة ومابتشوفوها وانا هالدرويش اذا سرقة قطعة جبنة بتقفروني ..وبالمقلاية بتحطوني ومن ريف عيوني بتعلقوني وبالقانون والنصوص عم ينفدوا هاللصوص
سياسة ازدواجية المعايير وصلة للعين الوحدة تبع الحكومة بس لسا مافهمت ستي شو الفرق بين الي بيسرق الف وبين يلي بيدحش وبيخبي مليار ورا مليار ..

ولك ياستي الفرق بين الي بيسرق الف وبين الي بيسرق مليار ..انو الاول هو  سرقته خيار تكتيكي ليسد جوع بطنو…وبس التاني على مايبدو بيسرق بخيار استراتيجي للفساد!؟ مامنعرف مين اخدو …والمليار عم يجي من سرقة صاحب الالف نفسو ..

ياستي منيح المتي…لانو هالايام باب الحكومة مفتاح بلاد درفة…عالفقير بتعص وعللص مابتحس

اظهر المزيد

مقالات ذات صلة

زر الذهاب إلى الأعلى
إغلاق
إغلاق