الديك الفصيحالعناوين الرئيسية

انهيار دكة البيجامة .. وإعلام الشطارة ..

|| Midline-news || – الوسط …

 

على ضو البيل .. بهالعتم التقيل .. قاعد أنا وأبو لسان طويل .. عم نتسلى بهالعتم اللي وفرته لنا الحكومة بجهود ذاتية دونما أي مساعدة من المسلح والإرهابي بتفجير محطة هون أو عن طريق عض كبل هنيك ..

الأمان والأمن مستتبين .. وقطع الكهربا هالمرة برعاية حكومة بلا ديون ..

المهم .. صرنا نتحدث أنا والديك الفصيح عن أهم الأقلام في الإعلام السوري .. نطيت وقلتله: طبعا الإعلام الحكومي صحيح مابيهاجم داخلياً .. بس متصدي ولاطي للغرب خارجياً .. هو أول من كشف المستور والمؤامرة .. وبيعرف شوفي بجيبة ماكرون .. وخزانة ميركل .. وقديش ذهباتها .. وشوفي بنملية الاتحاد الأوروبي .. وشو عندو صحون على الرفوف .. لك اتخيل إنو شركات الطيران تبع الاتحاد الأوربي بلشت تبيع بهالصحون تحت برج إيفل وقوس النصر بعد إغلاق كورونا !!

فنجر هالديك عيونو وقلي: شو هالحكي !؟ .. اتأكد الله يخليك .. مقدم عند ديك بيشتغل مهرب منشان هاجر .. وقلي إنو حتى العاطل عن العمل هنيك إلو راتب .. وإنو إغلاق كورونا فيه تعويض لكل متضرر ..

قلتله: قريت المقال بعيوني في إحدى صحفنا المرموقة يلي تركت كلشي وعملت ملف عن الانهيار الاقتصادي في أوروبا .. وطلع معها هالعجايب اللي مخبينها أهل القارة العجوز ..

قاطعني الديك وقلي: وما وقفوا الأوروبيين بالطوابيرعلى الأفران والغاز والمازوت كمان !؟ .. ديروا بالكم ليقوموا يسرقوا منكم فكرة البطاقة الذكية ..

قلتلو: والله عنوان حلو .. الأوروبيون يستفيدون من تجربة البطاقة الذكية ..

صرخ فيني هالديك وقلي: هو أهم شي مايستفيدوا من خبرتكم الإعلامية وهنن بألف خير ..

تصبح على خير ياحباب .. وعلى فكرة .. على سيرة الانهيار .. دكة البيجامة تبعك منهارة .. مابدي جاجاتي يشوفوا هالمناظر وهالشطارة ..

تابعوا صفحتنا على فيس بوك 

اظهر المزيد

مقالات ذات صلة

زر الذهاب إلى الأعلى