الديك الفصيح

المسؤول عنا مثل الونش.. شغلتو يرفع وبس.

|| Midline-news || – الوسط …

 

عضو المكتب التنفيذي بمحافظة دمشق لقطاع التموين مازن دباس.. قال إنن طالعوا تسعيرة جديدة للحلاقة الرجالية يا ناس.. لتصير ألف ليرة للدرجة الممتاز بعد ما كانت 500 ليرة.. و400 للتصنيف الشعبي بعد ما كانت 150 ليرة .. وحلاقة الدقن صارت 500.. بعد ما كانت بحيطان المية..

هلأ تركتوا الدنيا كلا واجيتو عالحلاقة.. ماشالله اللي بيسمع هيك بيعترف إنو أفكاركن خلاقة.. وبيفكر البلد ماشي عالصراط المستقيم.. والمواطن عايش بنعيم.. طيب اسعار التكاسي العمومي شو.. والسوبر ماركت واللحام شو.. لك أسعار المي شو.. واجارات البيوت واسعارا شو.. لك روضات الولاد والمعاهد والدوا والدكاترة شو..

عموما محافظة دمشق الشكر كل الشكر لجهودكم والتعب الي عم تبذلوا.. وكل الي للوطن والمواطن عم تقدموا.. من أفكار وتعديلات الله وحدو بيعرف كم اجتماع منشانا اجتمعتوا.. وكم من الليالي للبت بهالموضوع الحساس والمصيري سهرتوا.. شكرا على اهتمامكن الفعلي والعقلي واللوجستي تجاه شعراتو للمواطن السوري.. عن جد لازم نرفعلكن القبعة بشكل فوري..

خلص أنا بدي اعمل شعري جدايل للارض.. لأن انتوا حالفين ترجعونا لزمن الزير سالم.. ما هيك يا أوادم.. الله وكيلكن برفع التسعيرة معكن حق.. لأن غليانة البشاكير الشفرات بالبلد بس نحنا ما بنبطل نق..

يعني رسميا أجرة الحلاقة أعلى من كشفية الأطبا والطبيبات.. فبلا الدراسة وبلا العلم والشهادات… فتعلموا الحلاقة احسن من الهندسات.. ناس بتدرس اولادا طب وهندسه بينما سنه تعليم عند حلاق افضل من كل هالشهادات.. والراتب ابن ستين الف حنونة ايمت بدو ينرفع يا فخر الحكومات..

الله وكيلكن المسؤول عنا مثل الونش.. شغلتو يرفع وبس.. وغريب الاهتمام بتعديل تسعيرة الحلاقة.. وماحدا مهتم بتعديل الراتب الهزيل المقيت.. انو شو كلو رفع رفع إﻻ رواتبنا.. ليش الراتب كم الف فيه يا حبايبنا..

وإلى التصريح التالي.. فمدير حماية المستهلك بوزارة التجارة الداخلية علي الخطيب الحبيب الغالي.. قال إنو رح يترتب على رفع سعر أسطوانة الغاز الصناعي.. زيادة طفيفة على أسعار بعض المواد وربما بشكل جماعي..

وأكد الخطيب إنو في دراسة عم تقوم فيها لجنة مختصة.. لتتعرف على المنعكسات الي ممكن تأديلا زيادة أسعار المواد وتمتصا.. وطالب الخطيب التجار.. حتى تصدر الدراسة الالتزام بالحالي من الأسعار..

قلتولنا زيادة طفيفة عالأسعار.. إي حبذا لو تتم زيادة طفيفة على الراتب ودخل البسطاء المنهار..

وكان الأولى فيكن تقولوا هناك زيادة ليست طفيفة على راتب موظفي القطاع العام.. لأن رواتبهم طفيفة وخفيفة يا حرام.. بحيث لا تصل لليوم السابع من الشهر ولا بالأحلام.

لك انزلوا شوفوا الاسواق بعدين قولوا طفيفة.. بتحكوا عن زيادة الأسعار وما بتحكوا عن زيادة الدخل ولو بنسبة خفيفة.. لأ وأحلى شي رفع السعر.. وبعدين تشكيل لجنه لدراسة انعكاساتو عالسوق لك والله المواطن رح يطق من القهر..

ضلوا ارفعوا الاسعار.. و خلوا التضخم يكبر و يكبر.. لحد ما توقف عجلة الاقتصاد.. لان المواطن المعتر بالنهاية هو اساس هالعجلة في البلاد..

وعموما تؤبشني طفيفة.. وبنت عما ظريفة.. وصدقوني والله لنكيف.. والمواطن يأجر الفوقاني ويصيف.. وبمعيتكن بلاها كلمة طفيفة فيها استفزاز رهيب.. بس عموما رقبتوا سدادة مواطنا الحبيب..

وإلى التصريح الموالي فمدير كهربا ريف دمشق خلدون حدى قال.. إنو كمية التوليد المحدودة هي سبب التقنين بالشام يا رجال .. وخص السيد حدى السيدة زينب بتصريح عن سبب الانقطاعات الطويلة.. وقيمة فواتير الكهربا المنا قليلة .. قال السبب إنو بيتم تقدير الاستهلاك على كل العدادات.. بمعنى إنو بيتم تحميل فواتير الفاقد على عدادات المواطنين والمواطنات..علما إنو السيدة زينب كثرانة فيها للكهربا السرقات..

بس يا سيد حدى ليش ما بيطلعو الكشافين يقرأو العدادات وشو مشكلتن.. لأنو هاد غلط إنو يلي عم يسرق كهربا يدفع عادي ويلي ما سرق بيدفع غرامة تقدير وعن سرقة غيرو يعوضكن.. وهيك بسبب اهمال الموظف يلي بيجي ياخد العداد.. شركة الكهرباء عم تسرق المواطنين بعشرات مليارات الليرات ولا إيه يا ولاد..

و منطق إنو الكهربا عم تيجي خمس دقايق وتقطع نص ساعة.. لدرجة عطلت كل الاجهزة الكهربائية ببيوت الناس يا جماعة..

واتقوا الله لأن مو معقول حدا بيتو غرفة وصالون.. وما بيشغل غير نيون وتلفزيون.. تطلع فاتورو من الألاف سبعة وخمسين.. فلمين تشتكي الناس غير لرب العالمين..

يمكن صار بيكفي مو؟؟؟.. العما كيف هالمواطن بدو يعيش ولوووو؟؟؟

وفي الختام, مجلس محافظة دمشق أقر اقتراح لجنة الخدمات المتعلق برفع بدل خدمات المخاتير لتصير.. 500 ليرة لشهادة الزواج والله مو كتير.. و300 ليرة للولادة و سند الإقامة.. و200 ليرة لشهادة التعريف.. 100 ليرة لشهادة الوفاة وألطف يا لطيف.. الحمد لله ارخص شي شهادة الموت.. يلا منيح لو كانت وثيقة الموت غاليه كانو المخاتير دعو علينا نموت وعالقبر نفوت..

لك بشرفكن عهالوضع شهادة الوفاة مو اظرف من شهادة البكالوريا؟!.. ومن ثم طلع الصباح.. وديك الوسط الفصيح صاح.. يا مختار المخاتير لحكيلك الحكايه.. انا ما بحب الشرح كتير بس في عندي غايه.. زبطلي ورقة وتوقيع ومصرياتك جاهزة.. ما في داعي للتقليع ويا مختار المخاتير..

ديك الوسط الفصيح

اظهر المزيد

مقالات ذات صلة

زر الذهاب إلى الأعلى