الديك الفصيح

الكهرباء عادَتْ, حَقَّاً عَادَتْ..

|| Midline-news || – الوسط …

 

الإدارة المركزية بوزارة الكهربا.. بلا إحم ولا دستور ولا مرحبا.. وجَّهِتْ كِلّ إداراتَا الفَرْعِيِّة.. وشَرِكَات الكهربا بكل المحافظات السورية.. بضَرُورِة الالتزام بالبرنامج الِّي حَطِّتُو الوزارة لَتَأمين الكهرَبَا لَلمُواطنون.. بشكل عادِل ومُنتظَم ومضمون.. بإيَّام شهر رمضان وخاصَّةً بفترة الإفطار.. وبأوقات الذروة والأسحار..

وزَاد وعَاد المصدَر, بإنُّو أفَاد, إنُّون رفَضُوا يسمَحُوا لَأيّ عَامِل يفطَر ببيتُو بهَالشهر الفضيل, خِدْمَةً للمواطنين من الصغير للكبير..

لك إيْ طَوّْلُوا بالكُون يَا يُوب, مَا بدَّا كِلّ هَالقدّ.. هيك خبَر, مُمْكِن ينهِي حَياة المواطن بجَلْطَة أو فَالِج من الفَرَح والله عن جد..

ويبدو لهيك الكهرباءعادَتْ.. حَقَّاً عَادَتْ..

فَعِين الحَسُود فيها عُود.. والحرقص ياكل عيون عدوين سورية والدود..

وعلى هذا فأخبار الوسط تُعلِن عَدَمَ مسؤوليَّتِهَا وضميرا مستريح.. في حَال عَادَ التقنين بعد هاد الخَبَر من الديك الفصيح..

والحَلّ بالخَرَزِة الزَّرْقَا, من الحسودة الي أسنانا فرقا, وقِرَاءِة المُعَوَّذات.. والطَّلاسِم الخاصَّة بالحَسَد والعيون الصائبات..

لَإنُّو المواطن السوري العتيد.. صار يتمنَّى ما يخْلَص شهر رمضان بالمختصر المفيد..

وطبعا لَهَيّ الأُمنِيِة, الإيمان منُو السبب الوحيد.. بظِلّ تَحَسُّن الأوضَاع الكهربائية كتير.. الَّتِي يشهَدُهَا البِلَد مِنذُ بداية شهر الخير..

صَحيح إنُّو المواطن, بسببظرفو الاقتصادي ما بَقَا فيه يحتفِل بسِفْرَة رَمَضَانيِّة مُعْتَبَرَة على الإفطار.. بَس عَلى الأقَلّ, صار فيه ياكُل صَحِن المجَدَّرَة على ضَوّ وكأنو بعز النهار..

وفِي حَال إنُّو فِي دجَاج على السِّفْرَة فَصارِتْ مَحْسُوبِة كِلّ حَرَكِة إيد.. لَإنُّو مَا حَدَا رَح يتجرَّأ يستَغِلّ فِرْصِة العِتْمِة, لَيمِدّ إصبع أو إيدُ.. ويقتِنِص قِطْعِة جَاج مانَا إلُو.. بَعِد ما يخَلِّص حِصّْتُو..

فَيَا رَبّ تِقْوَى بلَدْنَا , ويعُود الأمِن والأمَان.. وما تِرْجَع بُكرَا حَليمِة, لَعَادِتَا القَديمِة.. وما ترجع لتنعاد.. بعد رمضان عن جديد عادة سعاد..

فعِين تَوافِيق تِحْرِسْكُون وتحرس الكهربا.. قُولُوا آمِين يا حلويييين..

الديك الفصيح

اظهر المزيد

مقالات ذات صلة

زر الذهاب إلى الأعلى
إغلاق
إغلاق