الديك الفصيح

الدبح برا المسالخ بعيد الأضحى.. جبتلك لبس العيد بس انت أوعى تنهق وتفضحني

|| Midline-news || – الوسط …       

 

بالعادة وللأسف بتكون الرقابة الصحية غايبة ببعض المناطق بالشام، الي بيتواجد فيها بياعين الأغنام.. وخاصة قبل عيد الأضحى المبارك عند المسلمين الكرام.

وغالباً بيتم ذبح الأضحية.. برا المسالخ بشروط أبدا منا صحية..

لهيك ضروري تنحط خطة للذبح برا المسالخ بعيد الأضحى.. لأنو سلبيات الدبح برا المسلخ وبغياب الإشراف البيطري عن الموضوع بيتسبب بمشاكل مضرة بالصحه.. هاد عداكن عن تلف اللحمة بسرعة بسبب درجات الحرارة المرتفعه..

غير تعرض اللحمة للتلوث بالتراب ودخان السيارات والدبان.. وما تنسوا بسبب المخلفات وبقايا الدبايح بتنتشر الحشرات والفيران.. الي بنصير نشوفا عالأرصفة وبالطرقات.. وعلى أطراف مكبات الزبالة والحاويات..

وبهالإطار, مدير الشؤون الصحية بمحافظة دمشق شادي خلوف أكد إنو ممنوع منعا باتا الدبح برا المسلخ من دون ترخيص.. لأنو مواطنا منو رخيص.. والمسؤول بوطنا على ناسنا وأهلنا حريص..

خلوف قال إنو الي بدو يمارس مهنة الجزارة برا المسلخ لازم يراجع مديرية الشؤون الصحية.. لتعطيه المحافظة الترخيص اللازم للدبح ضمن محلو بأيام عيد الأضحى البهية..

وزاد خلوف بإنو في لهالشي شروط.. وأولا تقديم طلب لياخد اللحام رخصة ويصير دبحو مزبوط.. مع كتابة تعهد بالذبح ضمن الشروط الصحية والمحافظة على النظافة.. ووضع مخلفات الأضاحي ضمن أكياس ورميا بالحاويات وهاد شي إضافي.. والي بيخالف رح يتم بحقو اتخاذ اجراءات.. مع مصادره لأدوات الدبح والاضحيات..

بس يا مولانا ليش لتسمح المحافظة بالدبح برا المسلخ.. الدبح برا المسلخ بيعني ببساطة أنو خسرتوا ايرادات كبيرة جداً.. والمواطن خسر امنو الصحي بأوامر من المحافظة وهاد أولاً..

أما ثانياً.. فوالله والله السنة الماضية مقابل بيتنا كنا رح نموت من الريحة والحشرات.. وعلى الشارع العام مليانة المخلفات.. ومع هيك ما حدا حكي مع اللحام وما كان سائل عن حدا.. وبرغم شكوى المواطنين لا تندهي ما في حدا.. وما حدا راقب.. كلوا إجا أخد العيدية وأفُل ذاهِب.. وللأسف صارت الشام مسلخ ويوميا في دبح بالحارات.. وقدام المحلات.. على عين الناس والدوريات.. وبعيد الأضحى بتتفاقم هالحالات.. لأنو من امن العقاب.. اساء الاداب..

وثالثا الأطفال شو ذنبن يشوفوا هيك مناظر.. أقل ما يقال عنها همجية لنحر وذبح ودم وشي بيكسر الخاطر..

ثم المدبوح برا المسلخ شو ضمنا انو لحم غنم أوبقر.. والخوف تنقرض بهالفترة القطط والكلاب والحُمُر.. فيلا للحق حالي وروح لملي كم قط وربيهن.. لأن بكرا بندور عليهن بسراج وفتيلة وما بنلاقيهن..

عموما ما في داعي لوجود مسالخ باعتبار كل العالم نازل سلخ بهالشعب.. والفواتير والأسعار والدولار والضرب و الحرب..

كل شي فاسد ومغشوش لحمة وجبنة ولبنة وفواتير وأسعار ودولار وكوى ونار.. كلا محطوطة لتسلخلنا.. وعن طورنا تطالعنا.. ومازال وطني عشقي.. وماااااع.. عرفتوا شلون..

ديك الوسط الفصيح

اظهر المزيد

مقالات ذات صلة

زر الذهاب إلى الأعلى
إغلاق
إغلاق