الديك الفصيح

البرغش وعلم الحياء..

|| Midline-news || – الوسط …

 

أسرَاب من البرغش منتشرة بالشام.. ونازلة قروصة بالمواطنين الكرام..

ولأن المواطن خط أحمر, فمدير الشؤون الصحية.. بمحافظة دمشق الأبية.. السيد شادي خلوف.. طمن المواطن السوري المنتوف.. إنو الحشرات الصغيرة المنتشرة بكل مناطق العاصمة منا مؤذية.. وإنن حطوا خطة إسعافية.. لمكافحة هالحشرات.. ضمن المتاح من الإمكانيات..

وزاد خلوف وعاد بإنو أفاد.. إنو انتشار الأعشاب الكثيف.. بعد موسم المطر الي نزل بشكل كتير كثيف.. خلا هالحشرات تتجمع بين العشب.. وتمارس هوايتا بنشر الفوضى والشغب..

ولما شد الشوب يبس العشب يا حبوب.. وطلعت الحشرات بأمان لتنتشر بكل مكان..

وكشف خلوف إنو المحافظة عندا أولويات.. برش البرعش بالمبيدات.. والأولوية للمناطق الي بتنتشر فيها بشكل كبير هالحشرات..

لكن يبدو انو سيارات الرش غير مرئية.. وندعو المواطنين لتلمسها بسراج وفتيلة ونظارة طبية

والله احلى شي موجود سلفا بقاموس تصريحاتكن.. هيي كلمة غير ضاره. حضراتكن.

طيب بما انا منا ضارة ليش عم تكافحوها بالمبيدات .. ما دامَا منزلية وأليفة هالحشرات؟.. وبيحوي كل 100 غرام منَّا على 20 غرام عالي الجودة من البروتينات..

فعن جد ما في داعي للرش.. دورة حياتو كلا 3 سنين هالبرغش.. ومنو منطقي المبيدات الحشىرية كرمال هيك قصة تنرش..

وطبعا غير انو دورة حيات البرغش قصيرة.. فهنن يا حرام طلعوا نتيجة الأمطار الهائلة بهالسنة المطيرة..

والحشرات والبعوض مفيدة للأرض.. وبتخلي التفاح يصير لونو أخصر وبتخلي الموز ييجي أصفر ومطَعوَج.. كرمال هيك ما بيصير نرشن.. ولا من بيوتنا نكشن..

عداكن عن انن  بيقولوا انو البرغش مفيد لتوازن البيئة بس السوريين ما بيرضيهن شي دخل أسمن نيقة عن الخليقة..

غير إنا بتساعد على حك مناطق بالجسم يا حبيب القلب والعين.. صعب توصلا الإيدين..

فالله عليكي يا محافظة الله.. بنشُدّ على أيْدِك وعم ندعي الله, بطول العمر يزيدك.. لِتَفْهِمِي المواطن على فوائد البرغش.. الي متلو ولا أنغش..

قِلْتُولْنَا الحشرات غِير مُضِرَّة ومنا مُؤذِيِة.. بس نسيتُوا كمَان تقولُوا إنُّو بتْجِيب الحَظ, وبتَعْطِينَا هُرْمُون السَّعَادَة ومَنظَرَا رائع ولُونَا جَذَّاب وحَجْمَا مَعقُول ورِيْحَتا زَكيِّة..

فيَلَّا بسِرْعَة أعزائي المواطنين الحبابين, قُومُوا جَهّْزُوا أموركُون , وافتحُوا شَبابيكُون.. لَاستقبال أكبَر عدَد من البرغش.. وبنَتمنَّى بالحلقة القادمَة من المحافظة تعَرِضلنا فَوائد الكوبرا والحَنَش..

الديك الفصيح

اظهر المزيد

مقالات ذات صلة

زر الذهاب إلى الأعلى
إغلاق