الديك الفصيح

اسعار القبور صايرة متل أسعار البيوت.. ففكر منيح قبل ما على قبرك تفوت..

|| Midline-news || – الوسط …

 

إذا بدك تموت لازم تفكر كتير بهالقرار.. لأنك بسورية إذا بدك تجمع حق قبر فممكن تحتاج فوق عمرك 3 أو 4 أعمار..

لأنو اسعار القبور صايرة متل أسعار البيوت.. منشان هيك فكر منيح قبل ما على قبرك تفوت..

للأسف السوريين ما عم يعرفوا يوفروا ليأمنوا حياتن.. فكيف بنص كل هالغلا والوبا والنار والكوى ممكن يدخروا ليأمنوا فبر بعد مماتن..

فبمجرد انك تسمع بسعر القبر بمقبرة الدحداح بالشام مثلاً.. بينتفض جسمك وبيعمل ثورة على حالو فوراً.. وبيصير قلبك وعقلك شغالين بنسبة 100 بالمية.. وبتصير كل وظايفك الحيوية قوية.. لأنك خايف من الموت..وخايف يوقف عقلك أو قلبك وعالقبر تفوت..

وسعر القبر يا جماعة.. طالع نازل متل الدولار كل ساعة.. وبيوصل بالدحداح لـ10 ملايين.. وبمقبرة باب الصغير بين مليونين وخمس ملايين..

علما انو المحافظة بتتقاضى سعر القبر لفقراء المسلمين باعتبارو تبرع.. لا تظلموهن وبترجاكن بلا تسرع.. لأنو الظلم حرام.. هيك قال الحكما بعلوم الكلام..

سمير دكاك عضو مجلس محافظة دمشق قال وافهموا هالكلام.. إنو مكتب دفن الموتى بالشام عم ياخد بس 4 ملايين عالقبر  فقط لا غير يا حرام..

وهالمبلغ مقابل تخصيص قبر بدمشق للمواطنين.. والحجة إنو هالأربع ملايين هنن تبرع لصالح أموات الفقراء من المسلمين..

دكاك أكد إنو مكتب دفن الموتى.. ما عم يعطي قبر لحدا.. إلا مقابل هالتبرع الإجباري.. يا دلي ويا شحاري..

والتبرع لازم يندفع والميت بطريقو للقبر.. وإلا أهل الميت, ما بيقدروا يدفنوه لا الظهر ولا العصر.. ولا عالعشا أو حتى الفجر..

وطبعا إضافة للأربعة مليون.. فالدفن لازمو شهادة وفاة من المختار يا مؤمنون.. مع إنو كلنا بنعرف .. إنو أهل الميت بسبب حزنن ووضعن النفسي ما بيكونوا فاضيين لهيك إجراء أو تصرف..

لك فهمونا ياها هي, 4 ملايين وتبرع وإجباري.. والله لو بشتغل فوق عمري عمرين ما بينجمعوا معي فبس موت ما بدي قبر ادفنوني بداري..

بس ماقلتولنا القبر بـ4 ملايين مع حوريات.. ولا ناشفة وهيك رح نبقى عالبلاطة والحجرات..

أو الأربعه مليون بتاخد الميت الله ياخد عدوينكون عالجنة بلا حساب.. لك شو, ما خبرتونا يا شباب.

ولا في بالقبر واي فاي  لهيك سعرو عالي.. بالله خبرني يا عضو مجلس المحافظة الغالي..

لك انتو أحسن شي اعملُوا القبر طوابق.. ولا قلكن يلا بطلنا نموت ما بقا الموضوع فارق.. بنشتري بيت وبنقبر حالنا فيه أحلى.. عنجد مو أحسن يا محافظتنا الكحلى.

عموما كتر خيركن أفرحتمونا.. وبفضلكن وحنانكن وحرصكن غمرتمونا.. وصار ينطبق علينا المثل القائل فوق الموتة عصة قبر.. عرفت شلون يا حبيب العمر..

الديك الفصيح

اظهر المزيد

مقالات ذات صلة

زر الذهاب إلى الأعلى
إغلاق