الديك الفصيح

ارتفاع الدولار وهمي والنت بأحسن حالاتو.. ضل بس تقولولنا انو راتب الموظف بيكفيه لآخر الشهر..

|| Midline-news || – الوسط …

 

حاكم مصرف سورية المركزي حازم قرفول.. الزلمة عم يقول.. إنو ارتفاع سعر صرف الدولار الأمريكي منو معقول.. وبيندرج ضمن الحرب الممنهجة الي عم تتشن على سورية لإضعافا اقتصادياً طيب أحسنت القول..

أما كيف عم يصير هالشي.. فبيقول السيد قرفول إنو في حدا لإضعاف الليرة السورية وزعزعة الثقة بالمصرف المركزي وإجراءاتو عم يصول ويجول.. ليدفع المواطنين للخوف والتخلي عن عملتن الوطنية أيوا كلام كتير مسؤول.

واعتبر قرفول إنو كل دولار بالبنك المركزي من حق الاقتصاد والمواطن السوري العظيم.. وأكد إنو ارتفاع الدولار ارتفاع وهمي وما لو أي مبررات أو مستند على الأرض إطلاقا حلو كلام واللهي كتير سليم..

طبعا ارتفاع سعر الصرف وهمي ما في شك سيدي الحاكم.. وهمي وصار600 يا أوادم.. فكيف لو كان جد.. كنا صرنا عظم على جلد..

طيب ارتفاع الدولار ووهمي.. وزيادة الاسعار الي صارت كمان وهمي..

بس باعتبارو وهمي بدنا ورقة رسمية تثبت هالشي.. منشان لما نروح نشتري سكر او خضرة أو أي شي.. وقالولنا سعرو ارتفع بسبب ارتفاع الدولار.. نصفقن بالإثبات المبين بنص وشن هالتجار..

عموما دخيل ربكن ما أحلاكن طامرينا بفضلكن طمر.. اساسا كل شي بأحسن حالاتو والنعم غامرتنا غمر..

لك مو عرفانين أصلا نعبر من الفرح والبهجة.. لان كل شي موجود ومأمن والأسعار رخيصة لدرجة..

بيحس حالو الواحد ما عم يدفع شي وهالكلام جد وما عم خربط.. لك متمني هيك ادفع وما يضل معي مصاري بس ما عم تزبط.. بضل بشتري بشتري وبيزيد معي لدرجة بوصل لحالة معها بكون من الضحك رح افرط..

فالحمد لله وللمركزي.. والشكر لله وللمركزي.. على سعر الصرف الوهمي وارتفاع الأسعار الوهمي..

بس إنو شو القصة يا جماعة.. ساعة ارتفاع الدولار وهمي وساعة النت بأحسن حالاتو وعم تتحفونا بتصريحاتكن كل ساعة..

ضل بس تقولولنا انو راتب الموظف بيكفيه لآخر الشهر.. عرفتوا شلون يا بشر.. لك ربٌ يُعبد..

الديك الفصيح

اظهر المزيد

مقالات ذات صلة

زر الذهاب إلى الأعلى
إغلاق
إغلاق