الديك الفصيح

إجراءات مصرفية  رمضانية  لدعم الليرة .. الكلمة الطيبة “حساب جاري” ..

|| Midline-news || – الوسط …

 

مصرف سورية المركزي عمل حملة لدعم الليرة السورية.. شعارا ادعم ليرتك بكلمة طيبة وقوية..

هالشي اجا بعد ما ارتفع سعر الصرف لمستوى قياسي جديد.. خلا الليرة تخسر كل المكاسب الي حققتا بالفترة الماضية ركيد ركيد.. وخاصة بظل اقتناص المضاربين الفرصة لزيادة أرباحن ودعاؤن هل من مزيد ..

بس فعليا هل يا ترى يا هل ترى ممكن معالجة واقع الصرف المتأزم بكلمة طيبة..

وخاصة انو الي عم يحاربوا الليرة منن مضاربين صغار وإنما حيتان كبار.. عم يتعاونوا بشكل كتير كبير.. مع جهات جوا سورية وبرا سورية وهالشي خطير..

ليدهورو حال الليرة السورية.. وهالشي أثبتتو تحقيقات هيئة غسيل الأموال ومكافحة الإرهاب الوطنية..

الي قالت انو في أشخاص وشركات عم يتواصلوا مع جهات خارجية.. لضرب الليرة السورية..

فهل يا سادة قد تجدي الكلمة الطيبة نفعا مع تجار الحروب والأزمات.. ألا يفترض أن يكون هناك إجراءات عالية المفعول والتأثيرات..

تتناسب مع حجم الضغط على الليرة لقطع دابر هؤلاء المضاربين.. وتمكين الليرة في سوقها مع إنزال أقصى العقوبات بحق المحتاين..

وليس تركهم يشتغلون على هواهم.. ليدفع الضريبة الاقتصاد المحلي والمواطن المعتر والمنتوفين سواهم..

مصرفنا المركزي العزيز الكلمة الطيبة بتنفع مع الطيبين.. أما الي عم يشتغلوا ضد ليرتنا واقتصادنا ما بينفع معن إلا العقاب هالسيئين..

لأنو من أمن العقاب أساء الأداب.. هيك أجا بالمواعض والحكم وكتب الآداب..

عمي بدك تدعم الليرة.. وقف إستيراد..

بدك تدعم الليرة قوّي الصناعة ولو كانت صناعة شحاطات أو سجاد..

بدك تدعم الليرة.. لا ترضى تدفع رشوة.. ولو حتى 25 ليرة ولو كان اسما فنجان قهوة..

بدك تدعم الليرة.. لا ترضى بالمحسوبيات.. ولا المعارف ولا الواسطات..

دعم الليرة مو بالحكي والشعارات والكلام الطيب.. وإنما بالأفعال يا حوبايب..

عموما يلا الله يرضى عليكن كل واحد يفوت على صفحة الليرة السورية.. ويدعمها بنكز ولايك و10 ملصقات ومردودة بس تتعافى الليرة انشالله وترجع قوية ..

وهي كلمة طيبة تكرموا.. ومن غير ما تقولولي يسلموا..

يا الله يا حنان يا منان شافي ليرتنا وعافيها.. و ارفع من شأنها و فك اسرها و بارك فيها..

وعلى سبيل الكلمة الطيبة كمان ماشالله هالليرة بتجننن شي ناهي.. وضرب الهي..

ورح زيدكن من الكلام الطيب بيت.. الليرة يا عمي بنت حلال.. أكابر.. أخلاق.. هضامة.. عقل.. وتقل..

كاملة مكملة..

الليرة واعية.. لطيفة.. ومهذبة..

باختصار.. الليرة منيحة.. وعملة أميركا الله وكيلكن كتير قبيحة..

وادعولا لليرتنا الله يشفيا.. ما قلتولي.. كيفكن فيا..

الديك الفصيح

اظهر المزيد

مقالات ذات صلة

زر الذهاب إلى الأعلى