الديك الفصيح

أحن إلى مكدوس أمي ومونة أمي

|| Midline-news || – الوسط …

 

أحن إلى مكدوس أمي ومونة أمي.. لانو المكدوس تاني اهم اختراع عرفتو البشرية بعد الديك الفصيح لك عمي..

فبعد المدارس اجت المونة.. وقمة هرم المونة المكدوس بأسعارو المجنونة..

وكلفة كيلو المكدوس وسطيا بين الـ 600 والـ 900.. حسب سعر مكوناتو من باتنجان سعرو  بين الـ100 والـ 150..  وفليفلة وصلت لـ 300 ليرة ليل يا عين، وتوم الكيلو بين الف والف و300 ليرة..  عداكن عن الجوز الي بيتراوح الكيلو منو بين 4 تالاف و 6 تالاف ليرة..  بينما وصل سعر كيلو الزيت البلدي ل 2000 ليرة..  ليرة تنطح ليرة..

وهالأسعار تسببت بانو كتير من العيل السورية..  كانت منا قادرة تتحمل تكلفة مونة المكدوس هالسنة وااااه يا خيي..

والمونة منا مكدوس وبس..  لسا في ملوخية وبامية وتوم وبرغل وعدس..

وبحسبة بسيطة من صحيفة تشرين.. تبين للجريدة انو العيلة المتوسطة يعني الي عدد أفرادا مو كتير يا سوريين..  بتكلفن مونة الشتوية 100 الف ليرة بس يا مواطنين..

لك اي عادي.. ما دام دخل المواطن كبير والراتب عم يكفيه وزياده.. لا وعم  يتبحتر فيه بحتره..  وعم يروح رحلات وسيارين ويمشي غندرة.. وعم يصرف على ملذاتوا الشخصية..  لأ وبيزيد منو ليشتري من غرامات الدهب كمية.. وحتى اذا المكدوس غالي بهيك راتب لازم الشعب كلو ياكل كاتو.. ويبعزق ويعيش حياتو..

لك العما مكدوس ومدارس وللتدفئة بالشتوية مازوتات..  واللهِ انه للعدوان الثلاثي هذا الشهر على جيبة المواطنين والمواطنات..

وما حدا من المسؤولين هامو كيف عايش الي عندو عيلة..  وما حدا من المسؤولين هامو اذا حط مونة ولا اذا جاب تياب مدرسة ولا اذا عندو اجار بيت شيله بيله..

حالة بدا حلم الله والشكوى لغير الله مذلة..  فلمين تشتكي حبة القمح اذا كان القاضي دجاجة مو تاركه للمواطن ولا للناطور حبة عنب بالسلة..  واذا الواح حكا بيقولو حكا الواح..  وإذا ما حكا الواح بيقولو الواح ما حكا وشو بدو يحكي ليحكي الواح.

بس ما قلتولنا عنجد عنجد قرض المكدوس ايمتا.. قال مكدوس قال.. يا دافع البلا والغلا..

ويلا ما وقفت عالمكدوس وما عاد بدنا مكدوس شبعوا انتو.. لأن المواطن شو بقيلو ياكول غير همو وخيبتو.. اذا المكدوس أسعارو سياحية..  و اللحمة والفروج اسعارا خيالية.. والخضرة طايرة بالسما ومو مهدية.. والفواكه صارت من احلام اليقظة.. والفول والحمص والعدس كمان سعرا خمس نجوم شو ضل فهموني بلكي الديك الفصيح يقتنع ويرضى..

ثم اخي المواطن واختي المواطنة المكدوس زيادة وزن فلازم ننتبه انو قنبلة سعرات.. و بيجمع تنتين من أغنى المواد بالحريرات.. زيت زيتون فيه 900 كالوري و جوز 700 كالوري.. بالتالي المكدوسة الكبيرة المجئجئة بالزيت بتطلع شي 320 كالوري وبتأثر عصحتك اخي المواطن بشكل فوري.. وعدد السعرات بالمكدوسة صعب يتقدر..  بس هاد أفضل تقدير باعتبار المكدوسة الكبيرة مدعومة وزيتا منا بيشرشر.. فجماعة الدايت..  ابكو بصمت.. وموتوا عالسكت.. وانسوا المكدوس قطع بت.. عرفتوا شلون سادتي المواطنين..

ديك الوسط الفصيح

اظهر المزيد

مقالات ذات صلة

زر الذهاب إلى الأعلى
إغلاق
إغلاق