أهم الأخبار
الرئيسية / رأي / مونولوج سوري 4 وأخير .. أمل بلا أمل

مونولوج سوري 4 وأخير .. أمل بلا أمل

|| Midline-news || – الوسط. .

=السلام عليكم ..

=عم حييك بتحية الإسلام ليش ما عم ترد..؟ يعني ما بتعرف أنو السلام يعني السلامة المطلقة .. يعني سلامة من كل شيء وبكل شي  .. بالصحة بالدين بالعرض .. وبالأرض ..؟ ما بتسمع دائما بقولوا اذهب بسلام .. إرجع بسلام ..ارقد بسلام .. اهبط بسلام ..  ؟

=سلام ! ياترى قديش ضل من هالسلام ؟ وياترى لسا منقدر منقول أنو السلام مفهوم مطلق ؟ ولا صار نسبي وبنسبة ضئيلة جدا كثيرا ؟ ..

= معك حق ..للأسف وصلنا لزمن طلقنا فيه السلام المطلق .. وعقدنا القران ع سلام محدود ومتغير بحسب ظروف الزمان والمكان .. منفصلوا ع مقاس مصالحنا ومندفع أجرته أو تمنوا من جيبتنا ..

= حاج ولوووو..لا تشاءمني ولا تبالغ كتير .. فاءلني شوي

= لا لا ما عم بالغ ..

= لا عم تبالغ ..

= طيب أنت ما عم تشوف و تسمع يلي عم يصير بالعالم ؟

= ليش شو عم يصير بالعالم ؟

=هاهااا سألتني شو عم يصير وأنا رح جاوبك .. ياسيدي بعد ماصار الكون كلو ميدان للحروب والقتل والتدمير والسرقة وأكل القلوب والأكباد وتقطيع الرؤوس والأوصال وقطع الأعناق والأرزاق .. هاد غير السبي والهبي .. فينا نقول إنو السلام صار نسبي

يعني خود مثال .. السلام بالنسبة للقاتل صار بتحصيل أجرة جريمتو بالدولار حصرا .. أما السلام بالنسبة لأهل المقتول صار بتحصيل ديتو ليأمنوا لقمة وكسوة ولادو أو.. بجوز السلام بالنسبة إلون إنو يحصلوا على جثته ويدفنوها في مقبرة قريبة ..

يا صاحبي السلام بالنسبة للمحاصرين يأمنوا الأكل والشرب وبالنسبة للمهجرين  سقف يآويهون من الحر والقرّ .. وبالنسبة للمهاجرين شقفة ورقة من البلد المضيف عليها ختم القبول فيه بصفة لاجئ .. والسلام بالنسبة للعسكري الشهادة أو النصر ..

أما السلام بالنسبة للأمهات فهوي عودة ولادون العسكريين العاملين أو المخطوفين لأحضانون .. وبالنسبة للأطفال عودة آباؤون ..وبالنسبة للعاشقة عودة المعشوق من الجبهة سالم .. وبالنسبة للماشي بالطريق يرجع بسلام يعني بلا ما تنزل ع راسو شي قذيفة أو صاروخ أو ينقصف عمرو بتفجير إرهابي ..

والسلام بالنسبة للــ..

= سلام قولا من رب رحيم .. شو جابك ع هالسيرة .. خلص ولوووو ..

= صحي أنا شو بدي بهالسيرة منرجع لحديثنا وبلا طول سيرة ..

= أنو حديث ..؟!

= أنو حديث ..! أي أي تذكرت .. كنت عم احكي عن الأخلاق ..

= الأخلاق ؟ ولك أنا سمعان بهالكلمة من قبل .. أي أي تذكرت .. هي نفسها يلي أرسل الرسول العربي الكريم محمد عليه الصلاة والسلام لإتمام مكارمها ..

= عليك نور ..وهي نفسها القواعد التي تنظم سلوك الإنسان وتتحكم بأفعالو وردود أفعاله لتكون مقبولة اجتماعيا .. بعدين بقولوا المستقبل للمجتمعات الأخلاقية

= دخلك .. لسا في منها أمل ؟

= ولك يا أخي بقولوا الأمل معقود بناصية الأخلاق

= يعني تقديريا قديش بقي من هالأمل؟

= والله بجردة حساب صغيرة بتبين معنا النتيجة .. خليني احسبلك ياها ..

يعني إذا قلنا الطائفية زائد تدمير الآثار والمتاحف والقلاع والمعابد زائد استحضار المستعمر ورفع أعلامو وراياتو زائد النزعات الانفصالية زائد النفط والغاز والمياه ناقص الدين ناقص الحضارة ناقص أمجاد التاريخ ناقص الثورات المشرفة لطرد المستعمرين ناقص الجغرافية ناقص الثروات الباطنية والظاهرية .. الحاصل تقسيم الحدود شو بساوي ؟ يساوي صفر عالشمال..

= لا لا.. لا تضخم الأمور.. يعني إلا ما يكن بقي شوية أمل.

= إيه في أمل .. بس ضئيل وما منشوفوا إلا إذا حطينا مجهر ع المقاومة الوطنية الشريفة شعبية وحكومية لكل هالنواقص .. هي الوحيدة يلي ممكن تنقل هالصفر من الشمال لليمين ليصير قيمة مضافة .

= بتعرف شو ؟ أنا مافي شي شاغلني قد القتل والمجازر والمقابر الجماعية .. يعني قديش هالأرض بلعت جثث ودفنت معها قصص بحلوها ومرها قبل ما تخلص وقبل ما يخلص دور الأبطال فيها ؟

= خفف الوطء ما أظن أديم الأرض إلا من هذه الأجساد ..

= هي شعر ما؟

= أكيد

= ومين الشاعر؟

= ولو أشهر من نار ع علم

= ذكرني

= هاد بيت من قصيدة تعب كلها الحياة للشاعر أبو العلاء المعري

= أي أي صحيح .. الشاعر يلي بفراستو عرف أنو رح يجي يوم ويقطعوا راسو فقال هاي القصيدة

= هلق المعريّ انقطع راسو ؟!

= أي طبعا لا ويا سيدي انقطع ببلدو ومسقط رأسو معرة النعمان بريف إدلب

= ومين قطعو؟

= ولووو.. جبهة النصرة يلي مسيطرة على المعرة.

= آه قصدك قطعوا راس تمثال المعرّي؟

= أي أي التمثال.. ليش تمثال الشخص مو تخليد لذكره وفكره؟ وقطع رأس التمثال مو يعني قطع خبر أفكار صاحب التمثال وفلسفته وذكره؟

= أي والله معك حق .. بس ما وقفت عالمعرّي .. يا سيدي كمان دمروا آثار نينوى وبابل بالعراق وتدمر بسورية .. الفرق أنو هدوك جبهة النصرة وهدول داعش .

= أي مو كتير هالفرق ما كلون من طينة وحدة.

=  ياترى ليش كل هذا الإجرام بحق الحجر .. ؟

= لأنون أعداء التفكير ..هواة التكفير ..أعداء الحضارة والجمال.. أبناء التخلف والقبح ..

= ولك آخ آخ ..شو بدو الواحد يذكر منك يا سفرجلة كل عضة بغصة .. ليش قليل سبي النساء ؟! يعني بدل ما كانت المرأة نصف المجتمع وواقفة ورا كل رجل عظيم وقدامه لا وسابقته بكتير أماكن وأحيان .. صارت سلعة بمخيمات اللجوء وسبية بأقفاص المسلحين و سجنوهم وعورة بفكرهم .. هاد غير إنها صارت أرملة وثكلى قبل الآوان ويا حسرة على إنسانيتك يا إنسان ..

= هه.. قلتلي إنسانية بالله شو بقي من الإنسانية ؟؟

= ولك ما بقي إلا القلة القليلة .. يعني لما بتجرد الإنسان من حقوقو وبتخلي عليه بس الواجبات وقتها بتكون جردتو من إنسانيته .. ولما بيضطر الإنسان يقوم بواجباتو بس ليحصل على لقمة أكلها وأكل ولادو بيكون تجرد من إنسانيته وصار مخلوق غريزي بعيش ليأكل ما يأكل ليعيش .. يعني بالمختصر بصير تعريفو الاجتماعي مو بس الفيزيولوجي .. حيوان ناطق ..

= حيوان ؟! ياترى الحيوانات بتكره بعضها متلنا ؟

= ذكرتني ببيت شعر بقول : وإن الذئب يترك لحم ذئب ويأكل بعضنا بعضا عيانا

= هلق نحنا مناكل لحم بعضنا ؟

= طبعا وعلى الملأ كمان.. ولا لتكون نسيت مقطع فيديو الإرهابي أبو صقر يلي أكل قلب العسكري السوري بحمص؟

= لا ما نسيت.. العمى بقلبو شو كرهتو

= أيحب أحدكم أن يأكل لحم أخيه ميتا فكرهتموه ؟ طبيعي تكرهو القرآن الكريم دعانا لنكرهو

= الكره .. الكره .. الكره .. طيب والمحبة قديش رصيدها بهالزمن ..؟ بس ما تقلي كمان هي صارت نسبية ..

= المحبة شعور والشعور ما بيتجزأ ..

= طيب أنت لسا صفيان محبة بقلبك ؟

= أكيد .. بدليل أنا لساتني بحب هويتي وبآمن فيها

= هويتك؟! يعني أنت أناني بتحب بس حالك وأهلك وطائفتك ومسقط رأسك

= لا يا أخي مين قال أنو الهوية محدودة بهالدائرة الضيقة؟

= لكن شو حدودها بالله؟

= يا سيدي أنا بحب انتمائي لوطني وللغتي ولثقافة وحضارة وتاريخ بلدي.. أنا منتمي لمنظومة أخلاقية ولمنظومة حقوقية ولمنظومة ثقافية ولمنظومة حضارية ولمنظومة إنسانية ..

أنا هويتي مرسوم عليها سنابل قمح ونبع مية حلوة وبحر مالح .. أنا بيني وبين أهلي وناسي خبز وملح ومي .. بتجمعنا حدود ولغة وجدّ ورب ّ ..

هي هيي هويتي بمفهوها الواسع مو المفهوم الضيق يلي حضرتك عم تحكي عنو.

= ودخلك كم واحد بهالعالم متلك؟

= متلي متايل

= أي حاجتك بقى .. من شوي كنت عم تقول ما صفي أخلاق ولا إنسانية ولا قانون ولا حضارة ولا مستقبل ..

= مبلا صفي وصفي كتير بس هلق هي ضمائر مستترة

= مستترة قلتلي .. وياترى مستترة وجوبا ولا جوازا ؟

= لا جوازا ..

= اشرحلي بالله أنا مخي سميك

= هلق طالما الفوضى مسطيرة ع الوضع العام بجوز لهي الضمائر تضل مستترة بس يمكن تحل محلها الاسماء يلي بتنوب عنها وقت منخلص من الفوضى ومنرجع ننعم بالأمن والأمان والاستقرار والاستقلال .. لما مننضف من جوا ومن برا .. لما بتعم المحبة وبتحكمنا الأخلاق .. لما بيتعزز الشعور الوطني والقومي .. لما مننتمي لحضارتنا وثقافتنا بعيدا عن التقليد الأعمى للغرب .. لما بيسود القانون بالنص والتطبيق ..لما منحاكم المجرم ومنكافئ المجتهد ومنعطي كل صاحب حق حقو .. لما منحط الرجل المناسب بالمكان المناسب .. لما منشوف المرأة مخلوق كامل بالمجتمع والدين .. لما منآمن بالقلب والعقل مو بالتعصب الأعمى والعبادة الشكلية .. لما منفصل الدولة عن الدين .. لما منخجل نهتف للمستعمر ونرفع راياتو .. لما منكسر الحواجز الطائفية والعرقية والطبقية بين الأخوة بالإنسانية ..

= معناها مطولة هالضمائر لتظهر ورح تتحول من مستترة جوازا إلى مستترة وجوبا  .. وجب التنويه

= لا أنت غلطان ..المسألة محتاجة مصالحة ومسامحة وعفو عما مضى ..

= ياعفو الله .. بس العفو عند المقدرة ..وأغلب الناس مابتقدر وخاصة يلي خسر روح ودم وأرض وعرض ..

= وأن تعفو خير لكم .. والله يهدي الجميع على صراط الوطن والإنسان والمحبة ..

= أي لكن السلام عليكم

= وعليكم السلام .

 

شاهد أيضاً

بقلم عزة شتيوي .. (دول التحالف + داعش ) تغرد على جثث الهجين ….و(لايكات) ترامب تملأ تطبيقات أردوغان

الوسط – عزة شتيوي لمن (يغرد ) المبعوث الأميركي للتحالف بريت ماكفورك على حائط تويتر …