أهم الأخبار
الرئيسية / رأي / مونولوج سوري 3…سلفة وسَلَف صالح؟؟

مونولوج سوري 3…سلفة وسَلَف صالح؟؟

|| Midline-news || – الوسط ..

 

=وقعلي  هـ السلفة

=سلفة شو؟!

=سلفة ع راتبي؟

=ليش راتبك ما عم يكفيك ؟

=يعني أنت ما بتعرف أنو راتبي ما بيكفيني!

=والله هي مشكلتك إذا ما عم يكفيك

=كيف مشكلتي ما فهمت؟ أنت مهندس وأنا مهندس راتبي ما بصرفو نهائيا وعايش ما أحلاني برفاهية

=كيف عايش وما عم تستخدم راتبك ؟ليش من وين عم تجيب مصاري حتى تعيش برفاهية!

=الحياة علمتني أن استخدم كل الوسائل لحتى عيش بالطريقة اللي أنا بحبها ..

=يعني الغاية تبرر الوسيلة ؟

=أي ,ليش لأ .. نحنا عايشين بمجتمع هيك فرض علينا نكون ..يمكن ما كون مقتنع بهذا المبدأ ولكن ما عندي خيار تاني غير إني كون مثلك ناطر الراتب وما يكفيني وهذا الذي لا أرغب به ولن اسمح له بالتحول إلى واقع  .

=يعني القصة عند قصة مصاري وبس ..والباقي تفاصيل ..مابتهمك كرامتك وإنو للي يفترض تكون  أغلى من كل شي ومن كل مال الدني ؟

=هلق بدي أسألك كيف ممكن يكون فيه كرامة بلا مال ؟أو ممكن تجتمع الكرامة مع الفقر والقلة والتعتير ؟ صعبة كتير مو هيك !!

=أكيد الفقر والتعتير يفقد الشخص جزء من كرامته بسبب حاجته للناس للي متلك.. بس على الأقل بضل محافظ على جزء كبير منها .

=اي جزء وأي كرامة ..حبيبي نحن  أمام خيارين لا ثالث لهما اما الفقر أو التجرد من الكرامة ونصبح  فاسدين  وأداة بيد غيرنا  والاثنين مافيهون كرامة ….وهيك مفروض علينا ولو الأنظمة تريدنا أن نعيش بجزء من الكرامة وليس بكاملها  ما كانت وصلتنا لهون

=هلق عم تحط المسؤولية عالدول والأنظمة .. وأنت بالله شو دورك ؟ لو كل واحد متلك سأل حالو هالسؤال وبطل ياخد ويعيش ويترزق من منصبه ما كنت أنا بحاجة إجي لعند واحد متلك لأطلب سلفة على راتبي ..

=حبيبي لو ما كنت أنا بدو يكون واحد غيري وكون أنا محلك .. يعني ألف أم تبكي ولا أمي ..

=هي أنانية وأحكام مسبقة ؟أنا وأنت منقدر نصلح ونكون إيد وحدة ونحارب يلي فرضوا عليك تكون هيك ويلي حاجوني إلك .

=حبيبي في غيرنا جرب كتير وفشل يبدو أنها  دوامة مستمرة وأنا أقول إن الدول والأنظمة هي التي تفرض أخلاقها على المجتمع وعلى الناس وأنظمتنا تريدنا   فاسدين وبلا كرامة بحكم الضرورة طبعا .. ضرورة العيش .

=هذا ليس مبرر ولا يمكن يكون مبرر.. الصراع بين النظام والمجتمع هو صراع أزلي ويفترض بالنهاية ومن مبدأ المثل يلي بقول “الكترة بتغلب الشجاعة” إذا كنا أكثرية رافضين نكون فاسدين لا تقدر الأنظمة أن تفرض علينا الفساد .

=كثرة شو عم تحكي عنها صاروا الفاسدين اغلبية سواء بالفعل أو بالنية ..يا صديقي أنت شايف وأنا شايف هي الأنظمة ما عندها مشكلة تكون حاكمة مع مجموعة من الأثرياء مجاميع الفقراء يلي موجودة بهالعالم العربي بأي وسيلة كانت ,بالتجويع ,بالظلم ,بالفساد وبالدكتاتورية .. يعني إذا لم تكن فاسدا بإرادتك ستكون فاسدا غصبا عنك .

=كيف يعني بدي كون فاسد غصبا عني ؟وهي أنت مديري وصاحب عملي لا تقدر ان تفرض علي أن  اكون فاسدا رغم اني بحاجة وجاي لعندك لقدم طلب سلفة على راتبي لكمل حاجياتي .

=هاهاه هي أنت قلتها أنا مديرك فيني أرفضلك طلبك وقلك ما معي مصاري وين بدك تروح ؟ بتشحد, بتدين إذا لقيت مين يدينك طبعا ,ياسيدي وفرضا لقيت ..من اين ستسد الدين  إذا راتبك ماعم يكفيك ؟طبعا ليك فيه متلك كتير وكان  ممكن يصير معي هيك وانحط بنفس الموقف بس  أنا قبلت أني كون فاسد وبلا كرامة قدام يلي أعلى مني ويلي حطوني بهاد المكان ولا إني كون بلا كرامة تجاه هاد المجتمع يلي بيحكم عالناس بمظهرها الخارجي وشو عندها مصاري ..

=صحيح أنا هلق بلا كرامة لأني محتاج واحد متلك فاسد وبلا كرامة  مو لاني فقير وبدي سلفة على راتبي..بس على فكرة أنا بفوت على بيتي مرتاح .. يعني مو مضطر أرضي حدا على حسابي وعيش خادم أو موظف صغير لحدا أكبر مني بعرف ومتأكد إنو من ورا فسادي عم يلم ويجمع ملايين الملايين على حساب هالناس الفقراء  يلي متلي ..

=ليك الفقر والكرامة برجع بكررلك ياها ما بيجتمعوا ووقت يلي بتعيش محروم من حقك بكل شيء وبتشوف غيرك يلي هوي متلك وممكن تكون أحسن منو مرفه وعايش ببحبوحة وبتسأل حالك ليش؟ وما بتقدر تجاوب وما بتقدر تعمل شي بتكون كرامتك ضايعة أو مفقودة أو مصادرة من هاد الشخص .

=هاد الكلام مو صحيح ولا تستطيع التعميم .. مو كل الناس  بتفكر مثلك أنت .

=لا لا هاد الكلام صحيح وأنت عم تحاول تواسي حالك .. ليك رح قلك شي وخدها مني ..إذا مفكر إنو الفساد والسرقة بهيك  بلدان وبظل هيك أنظمة عيب أو حرام أو عار بتكون غلطان وعايش خارج عصرك .. حبيبي اليوم عالية القوم وأفضل الناس للي بتعرفون وشايفون بمجتمعاتنا عم يشتغلوا هيك وكل واحد بطريقتو .

=هاد الكلام مردود عليه وصدقني أنت غلطان لو كان كلامك صحيح ما كنا اليوم  قدرانين نوقف على رجلينا ونكمل ولو بالحد الأدنى.. وكانت هالبلدان انهارت وانمحت عن وجه المعمورة .

=دخلك وشو بقي بهالبلدان واقف على رجليه ؟ يعني أنا ولا أنت مثلا موقفين هالبلد على رجليها ؟! حبيبي هي البلدان والأنظمة مشيانة بإيعازات يعني هي ما بتتصرف من عندها ولا مسموح إلها أصلا إنها تتصرف من عندها .. يعني بالعربي الفصيح هي الأنظمة متل المندوب السامي أيام زمان الفرق أنو هي منا وفينا بس .. ولوبدون يانا نكون شعوب عايشة بكرامتها الله وكيلك بكبسة زر بيقدروا يخلونا وهاد شي بتوقع صار مسلم فيه .

= شو هالاستسلام الرخيص وشو هالمبررات التافهة ! لو الشعوب كلها فكرت متلك ما كان صار ثورات بالتاريخ وما كان العالم تغيّر ..ويلي اليوم حاكمك وفارض عليك المندوب السامي وتكون فاسد كان هوي متلك ومتل  غيرك من الفاسدين بس فيه شعوب فقيرة ما قدرت تحملت الظلم ولا قدرت تستمر مع الناس يلي متلك فثارت عليها وغيرتها..الجوع بيعمل ثورة أي أي بيعمل ثورة ..ولازم تخافوا من الجوعانين

=ليك كل الثورات يلي عم تحكي عنها وصارت بالتاريخ وبهي الدول الكبيرة صدقني خدمت بطريقة أو بأخرى أصحاب الأموال والأثرياء, يعني بالعربي أصحاب مشاريع الفساد والصفقات المشبوهة بس الفرق بينا وبينون .. هني بسمّنوا الشعب قبل ما يدبحوه ونحنا دابحين الشعب عالعضم  و بصراحة أنا مو حابب اندبح عالعضم خليني عالاقل عيش كم يوم حلوين مرفّه مرتاح مو مديون ولا عالعضم متلك ..وشوف هالثورات للي عم تبرم بها الدول شو عملت بالناس .

=صحيح أنا عالعضم بس عضمي مرّ ومارح خلي حدا يدبحني ولا حتى يكسر عضمي والأيام بيناتنا.. واذا بدك تذلني بهالسلفة يا سيدي خلص ما عاد بدي ياها ..

=لحظة لحظة .. وينك صدقني رح ترجع وبدل السلفة رح تطلب سلف يا إما بدك ترضى تعيش هالواقع متل ما هوي وما رح تقدر تفلت من مخلب التاريخ  .

=هاد تاريخكم انتو وسأفلت منه ..فيكون تسرقوا التاريخ والحاضر كمان ..لكن  المستقبل ليس لكم ولأمثالكم  .

وسام داؤد ..صحفي سوري 

 

شاهد أيضاً

أردوغـان .. صاحب الظل الطويل في قمة اسطنبول .. وبــائــع الـكـبـريـت فـي أعـزاز وشــرق الـفـرات .. بـقـلـم عـزة شـتـيـوي ..

|| Midline-news || – الوسط .. من رآه وهو يتسلق القمة الرباعية حول سورية بأرجل …