أهم الأخبار
الرئيسية / الديك الفصيح / اللي بده ينتج كافيار .. يبيض هو وساكت..

اللي بده ينتج كافيار .. يبيض هو وساكت..

|| Midline-news || – الوسط …

 

أزمة بنزين بالبلد، والزَّحْمِة لَلسَّمَا , مع تَخفيض المُخصَّصات وتَراشُق الاتِّهامات..

هَالشي إجَا تَزامُنَاً مع إشاعات بتِحْكِي عن نيِّة وزارة النفط رَفِع الدَّعِم عن البينزينات..

مَصدَر بالشركة السوريِّة لَتَخزين وتَوزيع المَواد البتروليِّة “مَحروقات”، نَفَى إنُّو يكون سَبَب الزَّحْمِة عَ الكازيَّات, الحَكي الِّي عَم  ينْقَال إنُّو فِي دِرَاسِات لَتَخفِيض المُخَصَّصات الي بيتم استلاما عبر البطاقات الذكيِّات من البنزين لـَ 100 من الليترات..

المصدر كشَف إنُّو سَبَب الزَّحْمِة هُوِّي تأخُّر شِحْنَات الفيُول، ووجُود ضَغِط وزيادة طَلَب يعني شي مهول.

هاد غِير العُقوبات الاقتصادية.. المَفروضَة على سورية, والِّي هِيِّي السبَب الأوَّل والأخير.. بلَيَلِّي عَم يصِير..

هَلَّأ اختَلَفِتْ الرُّوايات حول أسباب أزمة البنزين.. لكن الرواية شبه الأكيدة بتقول انو السبب شفط السيدين يَأجُوج ومَأجُوج للبنزين السوري.. الجهات المختصة، ألقت القَبِض على يَأجُوج.. بينَمَا لَاذَ مَأجُوج بالفِرَار وهُوَ مَفْجُوج.. فَلَا تْأَكِشْنُوهَا.. بتِتْأَكْشَن لَحَالَا..

ومن جانب آخر.. وزير النفط والثروة المَعدنيِّة ببلادنا الغالية السورية.. صاحب المقام الرفيع والكلام البديع.. السيد عَلِي غَانِم المحترم، صال وجال ثم قال: إنُّو المَصادر الرَّسميِّة، بالجمهورية العربية السورية.. هِيِّي الوَحِيدِة بَس, الِّي بيحِقِّلَّا تصَرِّح عَن أيّ تَغْيِير بآليَّات تَوزِيع البِنْزِيْن, وكِلّ تَصرِيح.. بيطلَع مِن غِير هَيّ المَصادِر بيكُون مانُو صَحيح..

لك تعودنا عمي تْعَوَّدْنَا, بتِبْدَا الشغْلِة دايماً بإشاعَة , وبَعدين بتصِير واقِع.. مُو مشان شِي.. وْلَا مشان شُو.. بس مشان المواطن ما ينصدِم..

عموما تقول الحكمة: بتبيض الدجاجه بيضه وحده وسعرا يا دوب خمسين ليره ومع هيك بتملي الدنيا صراخ وصياح.. بينما بتبيض السمكة الآلاف من بيوض الكافيار الغالي ومن تم ساكت.. العبره دع إنجازاتك تتحدث عنك.. أو بيض وأنت ساكت..

وعَن مَوْضُوع خَلِط البنزين مع المَيّ، عاد السيد وزير النفط فأفاد, إنها إشاعَة.

لَإنُّو وزارة النفط بتنتِج البنزين وبتخَزّْنُوا وِفْقَاً لَلمُواصَفَات.. وأيّ خَلَل بيتِمّ كَشْفُوا بالكازيَّات.. بيتِمّ بحق المخالف أخِدْ الإجراءات وتطبيق العقوبات..

عموماً يلا يا شَباب, بدنا نطلع انشالله بكرا الساعَة سِتِّة الصِّبِح، مجموعة شباب وصَبايا, مشَان نساعِد يَأجُوج ومَأجُوج بالحَفِر لَيِطْلَعُوا بأسرَع وَقِت مُمْكِن, لأن الوضع صاير كارثي.. فَـ اللِّي حَابِب يطلَع مَعْنَا, يحِطّ رَقَمُو, مشَان نتواصَل مَعُو الصِّبِح.. وحَيَّاكُمُ الله..

الديك الفصيح

شاهد أيضاً

عام الزِّفِت العالَمِي السوري

|| Midline-news || – الوسط …   مُديريِّة الصيانة بدمشق , قالت إنها عم تشتغِل …